Vivian Motzfeldtip USA-p Issittumi atuuffia nutaaq ilungersunartorsiortitsigaluartoq taperseraa

Natop nunat ilaasortaasut sungiusarnerni amerlanerusuni nakkutilliinernilu ataatsimut akisussaaffimmik annerusumik tigusiffigisassaat; issittumi "nakkutilleeqataaneq" Arctic Sentry pilersillugu ippassaq tamanut saqqummiuppaa.

Naalakkersuisut danskillu naalakkersuisuisa Arctic Sentrymik pilersitsisoqarnissaa pingaartumik ujartugaraat.

Vivian Motzfeldtip Arctic Sentrymut tunngatillugu pissutsit KNR-imut maanna oqaasertalerpai.

- Ukiorpassuunngitsut matuma siorna sutigut tamatigut eqqissisimalluta, toqqissisimalluta inuunerput piffissap sivikitsuarakasiup ingerlanerani allanngornera. Tassanngalu uagut nammitsinnik misigisavut nunaqqatitta misigisaat aammalu pingaarnerpaatut uagut aaqqiissutissanik ujaaseqataarusunnerput, isumaqarpunga oqaasertat tamakkua nammitsinnik najuuttuulluta (Natomi aaqq.) oqariartuutigisarneri isumalerujussuusut, akisussaaffimmik nammitsinnik tiguseqataasuulluta, taanna oqarpoq.

Tuluit Nunaat issittumi suliaqarnermi Norgemi ullumikkut aqutsisuuvoq. Arctic Sentryli Amerikamiut akisussaaffiisa ataanniissaaq.

USA aqutsisuussasoq

Naak Kalaallit Nunaat Danmarkilu Natomi ilaagaluartut Kalaallit Nunaannik illersuineq nakkutilliinerlu Danmarkip suliassarinikuuaa.

Tamanna maanna allanngorpoq.

Issittumi sungiusarnissat nakkutilliinissallu USA-p nunap immikkoortuani Virginiami Joint Force Command Norfolkimi qullersaqarfianit aqunneqassapput.

Natop Supreme Allied Commader Europe-ia, general Alexus G. Grynkewich Amerikamiut sakkutuuisa timmisartortartuinit: - Natop ataatsimut aalajangiisarfiinut atatillugu Norfolk Amerikap avannaata Europallu akornanni attaveqarfiuvoq, tassa nunat killeqarfiisa marluk akornanni pilersaarusiornernik allanillu illersuinermi, taanna oqarpoq. Assi © : Jonas Roosens/Ritzau Scanpix

Vivian Motzfeldtip USA-p Natollu Issittumi sillimaniarnermut akisussaaffeqarnerulernissaat nuannaarutigaa; aamma naak qaammatini kingullerni ilungersunartoqangaatsiaraluarlunilu USA-p Kalaallit Nunaanni siorna sungiusarnerup peqataaffiginissaa tunuarsimaarfigisimagaluaraa.

- Oqaatigissavara ataaatsimiinnerit ullumikkut taanna peqatigalugu pitsarujussuarmik ingerlanneqarsimammata, nunanut allanut naalakkersuisoq oqarpoq.

- Uani oqaatigerusuppara oqaloqatigiinnerit aamma Amerikamiut qaffasinnerpaamik sakkutuut aallartitaannut oqaloqatigiinnigut pitsaasorujussuarmik ingerlammata, aamma tassannga tapersersorneqarlutik.

Nunanut allanut naalakkersuisup, Vivian Motzfeldtip (S) aamma illersornissamut ministerip Troels Lund Poulsenip Nato EU-lu januaarip 19-ianni ataatsimeeqatigaat.

Taakkulu pissutsit ilungersunarneranni qanoq tusarnaarneqartiginerlutik tusagassiortunik katersortitsinerminni nassuiaatigaat.

KNR-ip paasissutissarsiarisai naapertorlugit USA Natomi ataatsimiinnermi Arctic Sentrymut tunngatillugu qanoq isumaqarnerminik kisiartaalluni oqaaseqanngilaq.

Kangilinnguit sakkutooqarfiusimasut ilagaat. Taanna 2012-imi matuneqarpoq, nunanut allanut naalakkersuisulli sakkutooqarfiusimasoq taanna allallu Arctic Sentrymut atatillugu ammaaqqinneqarsinnaanerat mattutinngilaa. Tamannali oqaatigissallugu siusippallaartoq Vivian Motzfeldt oqarpoq. Assi © : Privafoto

Nunat assigiinngitsut officerinik sakkutuunik aallartitsinissamut periarfissanik misissuiartortitsillutik qaammatip siuliani nunatsinnukartitsipput.

Ataatsimiinnermi sakkutooqarfiit nunallu qanoq atoruminaatsiginerat, taakkulu pissutigalugit sakkutoorpassuaqartitsisoqarsinnaannginnera oqaluuserineqarpoq.

Issittumi Sakkutooqarfiup Kangerlussuarmi sanaartortoqarlunilu nutarterisoqarnissaa oqaatigereerpaa.

Vivian Motzfeldtip sakkutooqarfiusimasut ammaqqinneqarsinnaanerat maanna aamma oqaatigaa.

Sakkutooqarfinnik ammaaqqinneq

KNR-ip Issittumi Sakkutooqarfiup pisortaa, generalmajor Søren Andersen umiarsuarmi alapernaarsuummi Vædderenimi nunatsinni USA-mut akerliussutsimik takutitsisoqarnerata nalaani naapippaa.

Uanilu Natomi nunat najuunnerulissappata sakkutooqarfiusimasunik ammaaqqinnissaq isumaliutersuutigineqarnersoq apeqqutigaarput.

- Sumiiffinnik allanik peqarnersoq soorunami misissorparput, Issittumi Sakkutooqarfiup pisortaa oqarpoq.

Nunat iligisat januaarimi tikeraarnerannut atatillugu Issittumi Sakkutooqarfiup nunatsinni pissutsit qanoq inneri oqaluuseraat; tassunga iligisat sakkutuunik sungiusariartortitsissappata atortulersuutit periarfissallu suuneri ilanngullugit. Assi © : Henriette Simonsen / KNR

- Piginnaasagut qanoq innersut aamma Kangerlussuarmi atortorissaarutit pioreersut sunniuteqarfigerujussuanngikkaluarlugit qanoq iliuuseqarsinnaanerput soorunami misissorparput, taanna oqarpoq.

Natomi nunat Bruxellesimi ippassaq ilaatigut ataatsimiipput. KNR-illu Vivian Motzfeldt tassunga atatillugu; ilaatigut sakkutooqarfinnik ammaaqqinnissaanermut tunngasunik oqaloqatiginissaa periarfissaqarfigaa.

Taassumalu sakkutooqarfiusimasut pisariaqaqqilersinnaanerat mattutinngilaa.

- Kisianni annerusumik oqaaseqarfigissallugu siusippallaarpoq, Vivian Motzfeldt oqarpoq.

- Soorunami ineriartornerit assigiinngitsut aamma nunarsuarmi pisut aallaavigalugit, nunatsinni qanoq aamma sakkutuut sorlerni sumiiffinni najuukkusunneri taakkua siusippallaarpoq oqaatigissallugit.