Vivian Motzfeldt: Kalaallit Nunaata EU-llu attaveqatigiinnerat nukittorsarneqassaaq

Nunanut allanut naalakkersuisup, Vivian Motzfeldtip (S), EU-p nunatsinnut tapersiinera qujassuteqarfigaa.

Allattoq Ann-Sophie Greve Møller

maajip 19-at 2025 16:00

Nutserisoq Josefine Rasmussen

Nunanut allanut naalakkersuisoq, Vivian Motzfeldt (S) naalakkersuisutut siullermeerluni ulluni marlunni Bruxelles tikeraarpaa.

Motzfeldtip EU-p Nunanut Allanut Sillimaniarnermullu Politikkimut Qaffasissumik Sinniisaa Kaja Kallas, Belgiep illoqarfiisa pingaarnersaani ataatsimeeqatigaa, unionillu nunatsinnut tapersiinera, taassuma ilaatigut qujassuteqarfigalugu.

Tassanilu Kalaallit Nunaata EU-llu akornanni suleqatigiinnermi aatsitassarsiorneq pingaarnertut nukittorsarneqartussatut eqqartorneqarpoq.

Naalakkersuisut tusagassiutinut nalunaarummi taama allapput.

- EU Kalaallit Nunaata pingaarutilimmik suleqatigiuarpaa. Piffissamilu Kalaallit Nunaata ajornartoorfiani suleqatitsinnut tatiginartunik, uagutsitulli naleqartitaqartunut qanillinissarput pingaaruteqarpoq, Vivian Motzfeldt, tusagassiutinut nalunaarummi oqarpoq.

Aningaasaqarnikkut tapersiisoq

Nunatta EU-llu suleqatigiinneranni, aatsitassarsiornerup eqqartorneqarnerata saniatigut ilinniartitaaneq, mingutsitsinngitsumillu siuariartorneq, aalisarnerlu aamma sammineqarput.

Aamma atuaruk Immikkut ilisimasalik nassuiaavoq: EU Kalaallit Nunaannut ima pingaaruteqartigaaq

Ilisimatusarfimmi Forsvarsakademimilu lektori, aamma sillimaniarnermut nunanullu allanut tunngasunut ilisimatusartoq, Jeppe Strandsbjerg oqarnera naapertorlugu, EU Kalaallit Nunaannut ukiumut 250 millionit koruuningajalluinnarnik tapersiisarpoq.

Taamaalilluni Danmarkip naalagaaffianiit tapiissut tulleralugu, Kalaallit Nunaata aningaasaqarneranut tapersiisartuni annerpaat tulliattut EU inissisimavoq. Taanna KNR-imit marsimi 2024-mi apersorneqarnermini oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.