USA-p aqqartartuata Nuup eqqaani puttallariataarnera Jens-Frederik Nielsenimit maanna nassuiarneqartoq
Amerikamiut aqqartartuat angisooq, Nuummit 7 sømilinik ungasitsigisumiitilluni, immamit arfininngornermi ualikkut qaqutigoorluinnartumik puttallarpoq. Aqqartartumi inuttat ilaat nakorsiunneqartariaqalermat, aqqartartup puttallartariaqalersimanera, Issittumi Sakkutooqarfiup kingusinnerusukkut nassuiaatigaa.
Sakkutuut qulimiguuliutaat Seahawkeq umiarsuarmit alapernaarsuummit Vædderenimit annaassiniaanermut atorneqarpoq.
Tamanna innuttaasunit politikeriniillu tupigusuutigineqarpoq. Siumut allakkatigut ammasumik naalakkersuisunut ataasinngornermi apeqquteqaateqarpoq.
- Aqqartartoq pineqartoq taannaannaava imaluunniit arlariiuppat kiisalu sunik imaqarpa sunalu siunertaralugu nunatta sineriaani angalava? Tusagassiutinut nalunaarummi apeqqutigineqarpoq.
Suliaq pillugu Jens-Frederik Nielsen KNR-imit apersorneqareerpoq, saqqummersinneqannginneranili saqqummiunneqannginnissaanik piumaffigineqarpugut. Tamanna paasissutissat eqqortut piffissami tassani piginnerinik pissuteqartoq, maanna nassuiaavoq.
- Paasissutissat pissarsiakka paatsoorlugillu paasinerlussimavakka, tamannalu maanna naqqiissuteqarfigaara. Soorunami eqqortut oqaatigerusuppakka. Eqqortoq tassaavoq, aqqartartoq imartatsinniinngilaq, inummilli ikiuiniarlutik timmukarnissamik qinnuteqartoq. Tamatuma erseqqissaatiginissaa pingaaruteqarpoq.
Naalakkersuisut siulittaasuata, Jens-Frederik Nielsenip (D), takusap nalinginnaasuunngitsup pinnginnerani pisut, KNR-imit apersorneqarnermini nassuiaateqarfigai.
Taanna oqaluttuarpoq, Amerikarmiut aqqartartuanni inuttat ilaat napparsimarujussuarmat ikiorneqarnissaminillu pisariaqartitsimmat, Amerikamiut Kalaallit Nunaata imartaanukarnissartik februaarip 20-anni qinnutigisimagaat.
- Inuk aqqartartumi imartatsinniittumi nunattalu eqqaaniittumi peruluttoq pineqarpoq. Taamaattumik ikiuinissarput pisussaaffigaarput. Illersornissaq pillugu suleqatigiinnermi ataatsimooqataanerput eqqaamassavarput, taamaattumik ikiuinissatsinnut pisussaaffigut soorunami eqquutsikkusuppagut, taanna oqarpoq.
Illersornissamut ministeriaqarfiup uppernarsaraa
KNR-i Amerikami illersornissamut ministeriaqarfik aamma attavigaa. Pisoq pillugu apeqquterpaalunnut Amerimi illersornissamut ministeriaqarfimmi atorfilittaq akissuteqarpoq:
- Amerikami sakkutuut imarsiortuineersoq aqqartartoq atomip nukinga atorlugu ingerlatilik, inuttaq nakorsartikkasuartinneqartariaqalermat pilersaarutaanngitsumik Nuup imartaanukartariaqarsimavoq. Inuttaq Nuummi nakorsartippoq. Maannakkuugallartoq allanik paasissutissaateqanngilagut.
KNR-ip Issittumi Sakkutooqarfik oqaaseqartinniarlugu aamma attavigaa. Naalagaaffiit allat suliaat pillugit oqaaseqarneq ajorlutik taakkua allapput.
Isumakuluuteqartoqartariaqanngitsoq
Aqqartartoq USA-p præsidentiata nunatsinnut ataavartumik soqutiginninnera pissutigalugu soqutigineqarluarpoq. USA-p Kalaallit Nunaat tiguartariaqaraa, Donald Trump arlaleriarluni oqarnikuuvoq.
Jens-Frederik Nielsenilli aqqartartoq isumakuluutigisariaqanngilluinnaripput erseqqissaatigaa.
- Naak tassunga tunngatillugu paasinnittariaatsit assigiinngitsuusinnaagaluartut, suliaq illersornissaq pillugu suleqatigiinnerup iluani ingerlanneqarpoq, nunarpullu suleqataavoq. Tamanna nalunaarutit assigiinngitsut pissutigalugit, allatut immaqa paasineqarsinnaavoq, illersornissamulli tunngatillugu qanimut suleqatigiippugut, ukiorpassuarnilu suleqatigiippugut.
Nunatta imartaani allanik aqqartartoqarnersoq aperineqarami ima akivoq:
- Ilisimasagut naapertorlugit nunatta imartaani allanik aqqartartoqanngilaq. Kisianni aqqartartartut nunamit suminngaanneeraluartulluunniit nalinginnaasumik sumiissutsiminnik paasititsineq ajortut erseqqissaatigissavara. Aqqartartoq oqallisaasoq taanna USA-meersuuvoq, illersornissamullu suleqatigiinnermut ilaalluni, imartanilu sumiluunniit ikkaluarpat suleqatigiinnermi tunngaviusut malillugit suliaqarpoq.
Nalunaaruteqartussaatitaaneq
Pisoq immikkuullarissoq pillugu Naalakkersuisut nalunaaruteqajaarnerusimasariaqaraluartut Jens-Frederik Nielsenip aamma nassuerutigaa.
- Illersornissami immikkoortuniluunniit allani pisoqartillugu, soorunami nalunaaruteqartussaatitaavugut, tamannalu pikkoriffiginerulissavarput, taanna oqarpoq.
Taama pisoqarmat ullut marluk qaangiutiinnartut, USA-p præsidentia inoqatinut attaveqaatimigut Truth Socialikkut, umiarsuarmik napparsimmavimmik nunatsinnukartitsissalluni nalunaaruteqarpoq.
Jens-Frederik Nielsenip tamatumunnga qujaannarluni kingorna oqaatigaa.
