Ukrainep russit uuliamik akuiaaviat sorsuffiusumit 1.300 kilometerinik ungasitsigisumiittoq saassukkaa
Ukrainep sakkutuuisa russit uuliamik akuiaavii marluk sisamanngornermi saassuppaat. Taakku Ukrainep killeqarfianiit kilometerinik hunnorujulikkaanik ungasitsigisumiipput.
Ukrainep præsidentia Volodymyr Zelenskyj inuit attaveqaqatigiittarfiatigut X-ikkut taama allappoq.
Akuiaavik Bashneft-Novoil nunap immikkoortuani Basjkortostanimiittoq aamma akuiaavik Slavneft-Yanos Jaroslavlimiittoq pineqarput.
Akuiaavik Bashneft-Novoil Ukrainep killeqarfianiit 1300 kilometerinik ungasitsigisumiippoq Slavneft-Yanosilu killeqarfimmiit 700 kilometerinik ungasitsigisumiilluni.
-Ukrainep illersornissamut sakkutuuisa saassussisup suliffeqarfii sorsuffiusumit 1.300 kilometerit qaangerlugit ungasitsigisumiittut saassuppaat.
- Akuiaavik Bashneft-Novoil Basjkortostanimi eqqorneqarpoq. Nunap immikkoortuani Jaroslavlimi killeqarfitsinniit 700 kilometeringajannik ungasitsigisumit Akuiaavik Slavneft-Yanos eqqorneqarpoq, Zelenskyj allappoq.
Ukraine russit akuiaaviinik arlalinnik qaammatini kingullerni saassussivoq.
Saassussinerit Ruslandimi benzinaqarniarnermik ajornartorsiortitsipput.
Ruslandimi nunat immikkoortui arlallit juunimili ikummatissaaleqipput.
Sumiiffiit ilaanni orsiivinni aasaanerani naammattusaarisoqartariaqalersimavoq dunkinillu immiisinnaaneq inerteqqutaalerluni.
Rusland nunarsuarmi uuliamik tuniniaasut annersaannut ilaavoq. Nunap akuiaavii uuliap ilaatigut benzinanngorlugu suliarineqarsinnaaneranut pingaaruteqarput.
Ruslandimi uuliamik akuiaavinnut saassussisoqanngitsiartoq, Ukrainep umiarsuit arlallit Sortehavimiittut saassuppai, Zelenskyj allappoq. Ruslandip imartami tassani saassussinerinut akisinerupput.
-Ruslandip Sortehavimi saassussinerinut akinigut iluatsilluarput. Sakkutuut alapernaarsuutaat marluk umiarsuillu isertuussat eqqorneqarput, Ukrainep præsidentia taama allappoq.
Rusland Afrikamiut assartuutaannik Sortehavimi pingasunngornermi unnukkut saassussivoq. Ukrainemi oqartussat oqarnerat naapertorlugu umiarsuaq karrinik useqarpoq. Umiarsuarmilu sulisoq ataaseq ajunaarpoq.
RITZAU
