Ukkusissani ikuallattoqarnerani pumpit aappaata orsussaa imertanissimasoq
Ukkusissani tallimanngornermi ikuallattoqarmat imermut pumpit marluk atorsinnaanngillat. Pumpit aappaata ajoqutaa Uummanniaaneqareerluni maanna paasineqarpoq.
- Pumpip orsussaa benzin imertanissimavoq, tamannalu uunnaattoornermut peqqutaavoq, Avannaata Kommuniani upalungaarsimanermut pisortaq, Isak Pjetturson KNR-mut oqarpoq.
Pumpillu aappaata ajoqutaa suli misissorneqartoq paasineqanngitsorlu taanna aamma oqarpoq.
Akisussaatitsisoq
Pumpit ajornerat teknikkimut ataatsimiititaliami siulittaasup upalungaarsimanermullu pisortap akisussaaffigigaat ataatsimiititaliap siulittaasua pisumut misiginneqataasoq oqarpoq.
- Siulittaasutut akisussaaffigaara, suleqatigalugu upalugaarsimanermut pisortaq. Avannaata Kommuniani nunaqarfinni illoqarfinnilu tamani atortut tamarmik ajunnginnersut Avannaata Kommuniata tassuunakkut qulakkeertussaavaa, Niels Davidsen, Inuit Ataqatigiinneersoq, KNR-mut oqarpoq.
AAMMA ATUARUK Ukkusissani ikuallattoqarmat imermut pumpit marluk atorsinnaanngitsut
Upalungaarsimanermut pisortaq naapertorlugu, nunaqarfinni qatserisartut ukiumut sisamariarlutik sungiusaatigalutik atortuminnik misileraasarput. Ukkusissanilu imermut pumpit upernaaq misilinneqaramik ajorsimanngitsut, Isak Pjetturson KNR-mut siusinnerusukkut oqarpoq.
Aningaasaliinerusinnaasut
Ataatsimiititaliap siulittaasua upalungaarsimanermi atortut pillugit aningaasaliinerunissaq pisariaqartinneqarpat suliniuteqarniarluni piareersimavoq. Taassuma upalungaarsimanermut pisortaq tamanna pillugu oqaloqatigissavaa.
- Atortut piumasaqaatigineqartut pigineqassapput, taanna uanga akisussaaffigivara. Aamma tassuunakkut uanga piumasaqassuunga, kommunimi aningaasat pisariaqartinneqartut amigarsimappata atorneqarnissaat taanna piumasaqaatigissuara, Niels Davidsen oqarpoq.
AAMMA ATUARUK Politiit: Ukkusissani ikuallattoqarmat pinerluttoqarsimarpasinngilaq
Avannaata Kommuniani nunaqarfinni qatserisartut pikkorissakulanerunissaat taassuma misissussallugu sulissutigissallugulu neriorsuutigaa.