Politiit: Ukkusissani ikuallattoqarmat pinerluttoqarsimarpasinngilaq
Ukkusissani illu sapaatit akunnerisa siuliani tallimanngornermi ikuallammat pinerliisoqarsimanngilaq.
Politiit nunaqarfimmi ikuallattumut maannamut naliliinerat taamaappoq.
- Pinerluttoqarsimaneranik maannamuugallartoq takussutissaqanngilaq. Politiilli misissuinertik ingerlatiinnarpaat sumiiffimmilu misissuinerit inerneri maanna utaqqimaarlugit, politiit tusagassiuutinut nalunaarput.
Pingasut ajunaartut
Illu ikuallalermat inuit arfinillit isersimasimasut misissuinerit maannamut takutippaat. Taakkunannga inuit pingasut annaanneqarlutik Nuummukaanneqarput, putsumit ikuallammiillu ajoquserneri suliarineqarlutik. Taakkuali tamarmik inuunerminnik navianartorsiunngillat.
Illumiittulli allat pingasut ikuallattoqarnerani ajunaartut, politiit allapput.
AAMMA ATUARUK Ukkusissani ikuallattoqarmat imermut pumpit marluk atorsinnaanngitsut
Pinerluttoqarsimasinnaaneranik misissuisartut nakorsarlu toqusunik misissuisartoq Ukkusissanut ullumi tikissapput. Taakkua ikuallattumut paasiniaanermi ikiuutissapput.