Tusagassiutit: Frankrigip præsidentia Macron Kalaallit Nunaannut tikeraarniartoq

Franskit præsidentiata Emmanuel Macronip Kalaallit Nunaat aasamut tikeraarniarpaa.

Taama Sermitsiaq tusarfinniit tutsuiginartunit arlalinnit tusagaqarpoq. Kalaallit Nunaannut tikeraartoqarnissamik qaaqqusissutip tigulluarneqarnera nunanut allanut naalakkersuisup Vivian Motzfeldtip uppernarsarpaa.

- Uppernarsarsinnaavara Frankrigip naalakkersuisuisa qaaqqusinerput tigulluarmassuk, kisianni paasissutissat sukumiinerusut pillugit, siulittaasup allaffeqarfianut innersuussissaanga, Vivian Motzfeldt Sermitsiamut oqarpoq.

Nunanut allanut naalakkersuisoq maajimi Frankrigimut tikeraarpoq, tamatumunngalu atatillugu Kalaallit Nunaannut tikeraarnissamut qaaqqussissut tunniullugu.

USA-p præsidentiata Donald Trumpip ukiup aallartinnerani ilungersuatitsinerani, Frankrigip tapersersuisimaneranut Vivian Motzfeldtip partii Siumumeersup tikeraarnermini qutsavigai.

Nunarsuarmi qeqertani anginerpaaq aqulerniarlugu, sakkutuulersornissanilu mattutinngikkini piffinni arlalinni oqaatigiuarnikuuaa.

Sakkutuuliinissamut piareersimasoq

Tassunga tunngatillugu ilaatigut Frankrigimit oqaatigineqarpoq, Donald Trumpip kimigiisernera akiorniarlugu, Kunngeqarfik Danmarki qinnuiginnissappat, Frankrig Kalaallit Nunaannut sakkutuuliinissaminut piareersimasoq.

Franskit timmisartortartut Airbus A400M-imik Kalaallit Nunaannut minnissaannik ukiup aallartisimalernerani sungiusarneqarput. Sermeq apullu pissutigalugit aqqutissaanngitsukkut millutillu qangattarnissaat siunertaralugu sungiusarneqarput.

Emmanuel Macronip tikeraarnissaanut tunngatillugu Sermitsiaq paasissutissanik tigussaasunik pissarsiniarsarivoq iluatsinngitsumilli.

Tusagassiutit naapertorlugit, tikeraarsinnaanissaq suli pilersaarusiorneqartoq, taamaattumik angalaneq pisortatigoortoq suli taamaatiinnarneqarsinnaavoq kingusinnerusumulluunniit nuunneqarsinnaalluni.

/ritzau/