Trumpip oqaaseqarnera folketingimi politikerit isornartorsioraat: ”Ataqqinninnerunngilaq”
Timmisartorsuaq Trump Force One Nuummut mimmat nunatsinni tamarmi tupaallaatigineqaqaaq.
Tikittorli Donald Trump Jr. illoqarfimmut takornariaannarnerarluni oqarpoq.
Taassumali tikeraatsiarnerata nalaani angutaa – Donald Trump – tusagassiortunik katersortitsinermini nunatta amerikamiunit akisussaaffigineqalernissaanik suli soqutiginninnini oqaatigimmagu pisut eqqarsarnartoqalerput. Taassumami perusutani angunngikkuniuk aningaasarsiornermut tunngasunik kinguneqartitsinissamik sakkutuulersorsinnaanissamillu eqqarsaateqarpoq:
- Kalaallit Nunaanni igalaakkut silammut qiviaruit russit kiniserillu umiarsuaataat sumi tamaaniittut takusinnaavatit. Unitsittariaqarparput, Donald Trump Floridami Mar-a-Lagomi tusagassiortunik marlunngornermi katersortitsinermini oqarpoq.
Taamannalu pisunik aalassatitsineruliinnarpoq. Nunarsuarmilu tamarmi malugineqalertorpoq.
Trumpikkormiullumi oqaatigisaat iliuusaallu Københavnimi Christiansborgimi politikerit folketingimi ilaasortat ilaasa narrujuummissutigaat – ilaatigut Det Konservative Folkepartimeersoq Rasmus Jarlov TV2-mut ima oqarpoq:
- Nunap iligisap taama iliornera killissamik qaangiinerujussuusoq isumaqarpunga. Amerikamiut ataqqinnissuseqarnerunissaat naatsorsuutigisariaqaraluarparput. Kalaallit Nunaannut aamma Danmarkimut. Nunamik tuniniaganngivissumik taama kimiigiiserluni aqutsileriaanngornissamik eqqarsartoqarsinnaanngilaq.
Eqqarsarluaqqissaarnissaq
Donald Trumpip kalaallit saaffigalugit internettikkut attaveqaqatigiittarfiutini, Truth Social, aqqutigalugu marlunngornerup unnuaani allappoq.
- Kalaallit Nunaat pikkunartorsuuvoq, nunalu akisussaaffigilissagutsigu akisussaaffigilerutsigulu nunami inuiaat iluaqutigissaqaatigut. Nunarsuarmi amiilaarnartunik eqqarsarsinnaasoqarmat, uagut paarissavarput, Trump allappoq.
Taama nalunaaruteqarneq IA-mit folketingimi ilaasortap Aaja Chemnitzip nuannaarutigingaanngilaa. Nunattalu amerikamiunit aqunneqalernissaanik Donald Trumpip kissaateqarnera iluarinngilluinnarlugu isornartorsiuivoq.
- Isornarluinnarluinnartoq aarlerinartorlu isumaqarpunga. Kalaallit Nunaannik taama pisiinnariaanermik eqqarsarneq ataqqinninnerunngilaq. Tamanna nunatta kalaallillu kisimik aalajangigassaraat, nunarpullu tuniniagaanngilaq. Nunarput tuniniagaanikuunngilaq aamma uanga qinikkatut sulininni nunarput tuniniarneqarlernavianngilaq, taanna oqarpoq.
Aaja Chmenitzilli USA-mik suleqateqarnerulernissaq kissaatigaa.
- Siullertut Danmarkimik suleqateqarneq pitsaanerulissaaq, kingorna EU-mik suleqateqarneruneq kiisalu USA-mik suleqateqarneq. Tamanna nunatsinnut pitsaanerpaassasoq ilimagaara, taanna oqarpoq.
Pisorli danskit naalakkersuisuinut imaannaanngeqisoq, Socialistisk Folkepartiimeersoq Karsten Hønge erseqqissaavoq.
Trumpimi anguniakkaminik sorpassuarnik oqariartuuteqaraluartoq, taamaattoq kalaallit naamminneq aalajangernissaat pingaaruteqartoq, taanna TV2-mut oqarpoq.
- Maanna pisoq Kalaallit Nunaata qanoq aalajangernissaanut pingaaruteqarluinnartuuvoq. Aammali maanna pisoq pillugu Danmarkip qanoq iliornissani eqqarsaatigilluaqqissaartariaqaraa isumaqarpunga.
Suli suleqatiginnikkusunneq
Danmarkillu ministeriunera, Mette Frederiksen (Socialdemokratiet), pisorpassuit akornanni oqimaaqatigiisitsiniarsarisussaassaaq, taannalu Karsten Høngetulli eqqarsarpoq, akisussaafillu ingerlateqqillugu:
- Piffimmut nutaamut pinerput pillugu kikkut tamarmik, aamma nunat ilitta suleqatigisartakkattalu ataqqinninnissaat kajumissaarutigaara. Taamaammat oqallinnerit tamarmik sumi tamani aallartigatik Nuummi aallartittariaqarput.
Naallu Trump taama oqaaseqaraluartoq Amerika nunatut ilitut qanittutut suli isigigini, illersornissamut ministeri Troels Lund Poulsen TV2-mut erseqqissaavoq.
- USA-mik siunissami suleqateqarnerunissarput avaqqussinnaanngilarput. Amerikamiut Pituffimmi ullumi sakkutooqarfeqarput. Ataatsimoorluta qanoq periuseqarnissarput suli arlaleriarluta oqaluuserisagassaraarput, aamma siunissami qanoq suleqatigiinnissarput eqqarsaatigalugu.
Trumpillu oqariasaartarnera ersiginagu USA-mik suleqateqaannarnissaq pingaaruteqartoq, Siumumeersoq Aki-Matilda Høegh-Dam isumaqarpoq:
- Trumpip oqariallaqqinnera takornartaanngilaq, Trumpiuppat imaluunniit ernera Trump Jr. aamma takussaavoq taamannak sakkortuumik oqariartuuteqartartoq. Taamaakkaluartoq immaqa uanga oqariartuutigerusussinnaavara, uagut inuiaat kalaallit nunarput pigisussaavarput, nunarput uagut oqartussaaffigisussaavarput. Nunarpassuit akornanni suleqatigiinneq pilersittariaqarparput, soorlu Danmarki nunallu allat, immaqa aamma soorlu USA.
- Kisianni ukiuni hunnorujulikkaani Danmarkip nunasiaatigaluta matoqqasumik suleqatigiinnittarnera uterfigeqqikkusunngilarput. Uagut isumaqatigiinniarnerit aalajangersimasut nammineq ingerlakkusuppagut, kisianni nunamit allamit pigineqarusunngilagut, taanna oqarpoq.
