Toqutseriarsimasutut unnerluunneqartoq: - Inuttaanut utoqqatserusukkaluarpunga

Angutit pingasut eqqartuussaaneranni pisunit 21-usunit peqqarniinnerit marluk eqqartuussinerup sisamanngornermi aallartinneqarnerani qaqilerneqarput. 

Pisoq pineqartoq ukioq kingulleq apriilimi pisoq toqutserianermut tunngasuuvoq. Qaammatit sisamat qaangiummata, 2023-mi septembarimi pisoq, peqqarniitsumik nakuusernermut tunngasoq aamma qaqilerneqarpoq. 

Suliap akunnerni arfinilinni suliarineqarnerani, angut pisunut taakkununnga marlunnut unnerluussaasoq eqqartuussivimmi nassuiaavoq. 

Angutit pingasut suliami unnerluunneqarput, taakkunanngalu marluinnaat suliaq sisamanngornermi suliarineqarmat eqqartuussivimmiipput. 

Iliuuserisani uggorai

Angut 29-nik ukiulik, pisunit 21-usunit qulini unnerluunneqartoq siulliullugu pisut pillugit apersorneqarpoq. 

Taanna sikilluni assani paarlallugit eqqissilluni nassuiaavoq. 

- Ingerlaannaq uggualerpunga, peqqarniitsumik nakuusersimanini pillugu iliuuserisimasaminik apersorneqarluni ilaatigut taama nassuiaavoq. 

Nassuiaanermini oqaluttuarpoq pisoq tamaat filmiliorsimallugu, tamannalu unnerluussummi aamma allanneqarsimaoq. 

- Taamaaliorneq sianiitsuliorneruvoq, nipaatsumik taama oqarpoq. 

Pillarneqartussaasoq

Pinerlineqartup unatarneqarnissaannut suna pissutaanersoq pillugu, 29-nik ukiulik aperineqarami oqaluttuarpoq, angut meeqqanik kinguaassiutitigut atornerluisartuummat pillarneqartariaqarnera allamit tusarsimallugu. Unnerluunneqartup angummik arfinileriarluni tukersisimanini arfineq-pingasoriarlunilu timaatigut tillussisimanini, sapaatit akunnerata ingerlanerani siusinnerusukkut nassuerutigaa.

29-nilli ukiulik nakuusernermik aallartitsisuusimanngilaq. 

Eqqartuussinermi ippassaq aamma saqqummiunneqarpoq, nakuusernerup pinerani 29-nik ukiulik ilaatigut ima oqarsimasoq: "meeqqanik atornerluisartorsuaq", "paarngorniarit" aamma "kakkanniarpit?". 

Oqaatsit taakku nakuusernerup filmiliarineqartup nalunaarusiarineqarneranit atuarneqarput. Eqqartuussineq ataasinngornermi aallartinneqarmat videoliaq eqqartuussivimmi takutinneqarpoq.  

Taama oqarsimanini pillugu aperineqarami 29-nik ukiulik sikisaartorpoq. 

- Pisoq ajuusaarutigaara, tusaagakku aamma ajussutigaara. Utoqqatsersinnaasuuguma inuttaanut utoqqatsissagaluarpunga, sikilluni nerrivimmut isigiutigaluni unnerluuneqartoq nassiuiaanermini oqarpoq. 

"Toqussavakkit"

Pisut pingaarnerit marluusut pillugit, katillugu akunnerni marlungajanni 29-nik ukiulik nassuiaatinneqarpoq. 

Nassuiaatinneqarneratali nalaani unnerluussisussaatitaasoq eqqartuussisorlu isumaqatigiikkunnarput. 

Ukioq kingulleq apriilimi unnukkut pisoq pillugu unnerluuneqartoq nassuiaalluni aallartippoq. 

29-nik ukiullip nassuiaanera naapertorlugu, pinerlineqartup arnaatikua aapparigallaramiuk pinerlineqartoq aggersimavoq pinerliisoq toqunniarlugu. Pisup nalaani unnerluunneqartut allat pingasut namminermini pulaartorai. 

"Nalunngilara taqqamaniittutit, toqussavakkit", unnerluussaq pinerlineqartup stilladsip toqqavianik matumut kasuttorluni siorasaarisimanera pillugu oqaluttuarami, taama issuaavoq.  

29-nik ukiulik oqaluttuarpoq, matu ammarneqanngimmat pineqarlineqartoq inissiat quleriiaat aappaannut qallorsimasoq igalaarlu aneerasaartarfimmiittoq aserorlugu isermat, akunnerminni perulluliorneq aallartissimasoq. 

29-nik ukiulik eqqartuussivimmi nassuiaavoq perulluliornerup nalaani pinerlineqartumit niaqqumi tunuatigut stilladsip toqqavianik anaaneqarsimalluni. 

- Pisoq sukkaqqimmat tupaqqaqigamalu allamik eqqaamasaqanngilanga. 

- Kisianni toqunnisaannik siunertaqanngilanga. 

Toqusumik isigerusunngitsoq

Toqutseriarnermi peqqarniitsumik nakuusersimasutut unnerluunneqartoq 31-nik ukiulik aamma isersimavoq. 

Paggittut unitsinniarlugit akulerussimalluni taanna eqqartuussivimmi oqaluttuarpoq, unnerluunneqarnermisulli pinerlineqartumik tillusisimannginnini tukersisimannginninilu aamma oqaatigaa. 

Kisianni "taanna piareersimavoq", unnerluussaq pisoq pillugu eqqartuussivimmi oqaluttuarpoq. 

- (Pinerlineqartoq, aaqq.) inissiamut isermat piareersimavunga, saassunneqarnissara ilimagigakku. 

Taamatulli pisoqanngilaq, akerlianilli pinerlineqartup 29-nillu ukiullip isaariami pagginnerat ingerlaannarpoq, pinerlineqartorlu uppisinneqarpoq niaqqunilu stilladsip toqqavianut nunamiittumut aportikkamiut aattorujussuanngorpoq. 

Pinerlineqartup niaqqumigut aannini toqqutigisinnaammagu angutit taakku marluk unitsinniarsimallugit 31-nik ukiulik nassuiaavoq. 

- Toqusumik isigerusunnginnama, taanna nassuiaavoq. 

Eqqartuussineq sisamanngornermi ualikkut sisamat-qeqqata missaani unitsinneqarpoq ullumikkulli ingerlateqqinneqassalluni. Sapataatit akunnerata tulliani aamma ingerlateqqinneqassaaq.