Tillinniartoqaaluttoq – inuusuttut inissiiffinneersut tillinniartuusut
Nuummi tillinniartoqallattaavoq. Tillinniarnerit– ilaatigut suliffeqarfinnut, atuarfimmut, Katersugaasivimmut angerlarsimaffinnullu tillinniarnerit qulit sapaatit akunnerini marlunni KNR-ip oqaluttuarai.
Pisut malunnaatillit nutaarsiassaanngitsut, Kalaallit Nunaanni Politiini politikommissærip, Johan Westenip oqaatigaa.
- Piffissami matumani tillinniarnerpassuusut oqaatigisinnaavarput. Taakku sapaatini akunnerni kingullerni aallartinngillat. Pinerluuteqartut kikkuuneri ilimagisinnaavarput.
Inuusuttut eqimattat ikittut pingaartumik meeqqat angerlarsimaffiineersut aamma inissiisarfinneersut unnuaanerani pinerluuteqartarput.
Inuusuttulli tillinniaannarneq ajorput. Unnuup ataatsip ingerlanerani biilinik aallarussisinnaapput, aserorterisinnaapput sumiiffinnullu arlalinnut isersinnaallutik.
- Biili ikumaannarsimappat matuersaataa tigusarpaat, taamaalillutik unnukkut biilerlutik sumiiffinnut assigiinngitsunut tillinniartarput. Politiini sulininni inuusuttut tillitaminnik tunisaqarnerminni aningaasat hashimik pisissutigisaraat arlaleriarlunga naammattoorpara.
Tamanna pissutigalugu politiit biilinik tamanik unnuap ingerlanerani unitsitsisalernissamut politikkeqalerneranik kinguneqarpoq.
- Upalungaarsimallutik angalasut meeqqat unnuaanerani angalaartut nakkutigillugillu biilit tamarmik unitsittarpaat, amerlasuummi unnuaanerani ingerlasarput. Biilinik aallarunneqarsimasunik unitsitsinitsinni ilaatigut iluatsitsisarpugut.
Pinerluuteqarnissamut sungiusartut
Politiit inuussuttut pinerluuteqartartut ulluinnarni attaveqarfigisarpaat. Taakku tigusarineqarlutik politeeqarfiliaanneqaraangata angajoqqaat imaluunniit inissiisarfiit attavigineqartarput. Tamannali sunniuteqarpallaarneq ajortoq, Johan Westen oqarpoq.
- Inissiisarfinni meeqqanik paarinninnissamut ajornartorsiuteqartuneersuusarput. Unnuaanerani tigugaangatsigit meeqqat angerlarsimaffiannut angerlaattarpagut, kisianni minutsit tallimat qaangiukkaangata aneqqittarput, taanna oqarpoq.
Politiit piffissami matumani inuit pingaartumik marluk siusinnerusukkut tillinniarlutillu allamik pinerluuteqarsimasut alapernaappaat. Tamannali tillinniarnernut unitsitsinissamut iluaqutaanngilaq. Ajornartorsiutaasorli annertunerulerpoq.
- Tamannalu taakku marluk peqatigisartagaasa tillinniarnissamut ilinniartinneqarsimanerannik pissuteqarpoq. Malinnaasut ilinniartarput. Oqarasuaatikkut attaveqatigiittarput tillinniarnissaminnullu naapittarlutik.
Isumaginninnermi oqartussanut kajumissaarut
Johan Westen Namminersorlutik Oqartussanut kiisalu Kommuneqarfik Sermersuumi isumaginninnermi pisortamut attaveqarsimalluni oqarpoq.
- Meeqqat paarineqartut nakkutilluarneqarnerunissaat takutinniarlugu qanoq amerlatigisut inissiisarfinnit assigiinngitsunit qimaasarnersut misissueqqissaarfigaara. Arlalinnik pinerluuteqareerlutik sivitsunngitsoq aneqqissinnaasarnerat iluaqutissartaqanngilaq.
Inuusuttut pinerluuteqarnermi pillaatissinneqarsinnaanermut ukiuisa ammut killingata ataaniimmata imaluunniit inissinneqarsimasuummata isumaginninnermut oqartussat pinerluuteqartoqaqqinnginnissaanut pilersaarusiornissaq akisussaaffigigaat politikommissærip paasissutissiissutigaa.
- Inuusuttut susassaaleqinerat pissutaasinnaavoq. Imaluunniit inuusuttunut inissinneqarsimasunut ikiuinissamut imaluunniit susassaqartitsinissamut pitsaasumik pilersaaruteqannginnera pissutaasinnaavoq.
Ima nammineq iliuuseqarsinnaavutit
Suliffeqarfimmik piginnittuuguit assiliissutivit videoliutaanik qanillisinneqarsinnaasunut nutarterinissat politiit kaammattuutigaat.
Tamatuma saniatigut inuusuttut tillinniarsimasut iliuusaannut kinguneqartitsineq malugisinnaaniassammassuk iseqqusaajunnaarsinneqartariaqarput.
- Pisiniarfimmut tillinniarsimasoqartillugu inuk pisiniarfimmit anillunilu iseqqissinnaasarpoq, naak aatsaannguummat tillinniarsimagaluarlutik aamma nakkutilliisoqaraluartoq. Pinerluuteqartut pisiniarfimmit qaninnerpaamit 5 kilometerinik ungasitsigisumi piniartariaqartalertuuppata tamanna allannguffiusinnaassagaluarpoq.
