Siumup naalakkersuisut inatsisinik unioqqutitsisimanerarpaa: Jens-Frederik Nielsenip tamarmik eqqunnginnerarpai

Siumut naalakkersuisoqatigiinnit tunuarnissamik sioorasaaruteqarpoq.

Tamanna Anna Wangenheimip (D) aamma Naaja Nathanielsenip (IA) naalakkersuisuunermi saniatigut Folketingimut qinigassanngortinneranik tunngaveqarpoq.

Aleqa Hammond (S) naalakkersuisut marluk Folketingimut qineqqusaarnerminni sulinngiffeqarniartariaqartut isumaqarpoq.

- Naalakkersuisut allanut qineqqusaarniarunik siulersuisoqatigiinnut qinnuteqassapput. Qinigassanngortikkusukkunik sulinngiffeqassapput, taanna oqarpoq.

Siumumit Lars Poulsenip naalakkersuisunut tapersiinini isumaliutiginiarlugu aamma oqaatigaa. Taanna partiimi siulittaasuanit taperserneqarpoq.

- Naalakkersuisuni ilaasortat inuiaqatigiinnik sullissitillutik soqutigisaminnik allanik ingerlassisinnaanngillat. Inatsisartut inatsisaat malissavaat. Lars Poulsenip naalakkersuisoqatigiinnut isornartorsiuinera taamaattumik paasinarpoq, Aleqa Hammond oqarpoq.

Aleqa Hammondip naalakkersuisut inatsisinik unioqqutitsinerarlugillu Jens-Frederik Nielsen akisussaatinneqarnissaa piumasaraa, taamaattoqanngippat Siumut naalakkersuisoqatigiinnit tunuassaaq.

KNR-ip Jens-Frederik Nielsen tamanna pillugu apersorpaa, isornartorsiuinermullu tunngatillugu oqaaseqartillugu.

Pasilliutigineqartut tamarmik itigartitsissutigigai

Naalakkersuisut siulittaasuata inatsisinik unioqqutitsisoqanngissoraa.

- Soorunami inatsisimik uniuinerunngilaq. Naalakkersuisutut ataasiinnarmik atorfeqarsinnaatitaavutit, taamaammat marlunnik atorfeqartoqartuuppat unioqqutitsinerussagaluarpoq. Qineqqusaarneq taavalu folketingimut sassarneq, taanna pisinnaatitaaffiuvoq inatsisitigut, sumilluunniit killilersugaanngitsoq, Jens-Frederik Nielsen oqarpoq.

Anna Wangenheimip Naaja Nathanielsenillu marlunnik qinigaaffeqarniaratik oqaatigaat. Taamaammat Folketingimut qinigaassagaluarunik tunuarnissartik piareersimaffigaat.

Anna Wangenheim (D) aamma Naaja Nathanielsen tamarmik naalakkersuisuullutik Folketingimut qineqqusaarput. Taakku marloqiusamik qinigaaffeqarneq akuerinagu oqaatigaat, taamaammat qingiaassagaluarunik atuuffimminnit tunuarnissartik piareersimaffigaat. Assi © : KNR

Jens-Frederik Nielsenip kikkulluunniit Folketingimut qinigassanngortissinnaasut erseqqissaatigaa – aamma naalakkersuisuni ilaasortaagaluarunik.

- Folketingimut qinigassanngortinniaraanni Inatsisartunit akuersissuteqarfigineqarnissamut inatsisitigut piumasaqaataanngilaq, taanna oqarpoq, nangillunilu:

- Naalakkersuisut siulittaasuatut naalakkersuisuni Inatsisartunilu ilaasortat innuttaasullu allat qinersisinnaatitaanermut pisinnaatitaaffiiarsinnaanngilakka. Tamanna pisinnaatitaaffiuvoq, kiffaanngissuseqarput, taakkulu tamanna atorniarlugu aalajangerput.

Sioorasaarineq uggorigaa

Naalakkersuisut siulittaasuata folketingimut qinigassanngortittut marluk naalakkersuisoqatigiinnit peqataajunnaarnissamik sioorasaaruteqarnermik kinguneqarsinnaanera uggoralugu KNR-imut oqaatigaa.

- Folketingimut qinigassanngortittoqarnerata kingunerisaanik partiip naalakkersuisoqatigiinnut ulorianartorsiortitsisinnaanera uggoraara.

Taassuma naalakkersuisoqatigiit sulinerat qinersisoqarneranit sunnerneqarani ingerlaannassasoq, taassuma erseqqissaatigaa.

- Naalakkersuisoqatigiit isumaqatigiissut aallaavigalugu suliaqarput. Naak folketingimut qinigassanngortittoqaraluartoq inuiaqatigiinnik sullissilluta ulloq unnuarlu sulivugut, politikkimi isumaqatigiissutigut piviusunngorniassammata. Tamanna tunngaviuvoq, Jens-Frederik Nielsen oqarpoq.