Siulittaasoq danskit Issittumi suliaqarnerannik naammaginninngitsoq

Naalakkersuisut nunatsinni umiarsuarnik issittumi atorneqartussanik nutaanik sanaartornissamik pilersaarut, ukioq ataaseq affarlu matuma siorna saqqummiuppaat.

Umiarsuarnik taakkuninnga sanaartortussamik isumaqatigiissuteqartoqanngilaq, tamannalu Naalakkersuisut siulittaasuata Jens-Frederik Nielsenip (D) "naammaginannginneraraa“, DR allappoq.

- Isumaqarpunga umiarsuit maannakkut pisoqaavallaarnerat pissutigalugu umiarsuarnik alapernaarsuisussanik nutaanik sanaartortoqarnissaa aalajangerneqarmat, piviusunngortinniarneqapallattariaqartoq. Tamannalu pillugu oqaloqatigiinneq, tusagassiuutikkut pinnani, danskit naalakkersuisui peqatigalugit pissaaq, taanna DR-imut oqarpoq.

Umiarsuit tallimat nutaat, umiarsuarnut alapernaarsuutinut pisoqalisunut, nunatsinni nakkutilliisunut, taarsiunneqarnissaat pilersaarutaavoq.

Illersornissamut ministereqarfiup Frederikshavnimi umiarsuarnik tallimanik issittumiittussianik naalagaaffimmit pigineqartumitk katiteriffissaliortoqarnissaa tusagassiuutinut februaarimi nalunaarutigaa.

Isumaqatigiinniarnerit umiarsuarnut teknikkikkut paasissutissat sukumiinerusut aatsaat inissinneqarpata aallartissinnaanerat nalunaarummi oqaatigineqarpoq.

Ulapputigineqarnerussasut

Illersornissamut ministereqarfiup umiarsuit qanoq atorneqarsinnaanerannut tunngatillugu sakkutooqarnerup tungaatigut ilisimasalinnit innersuussisoqarnissaa umiarsualiortussallu kikkuussanersut isumaqatigiissutigineqassasut aamma nalunaarutigaat.

Politikerit arlallit umiarsualiortussamik suli isumaqatigiissuteqartoqarsimannginnera siornatigut isornartorsiorpaat.

Inatsisartuni politikerit umiarsualiornerup suli aallartinneqannginnera aamma naammaginarinngilaat.

DR-ip nutaarsiassiinera naapertorlugu, Inatsisartut nunanut allanut sillimaniarnermullu ataatsimiititaliaanni siulittaasup, Pipaluk Lyngep (IA) Danmarkip umiarsualiornissamik ulapputeqarnerunissaa kajumissaarutigaa..

Umiarsuit pingasut nutaat, Danmarkip umiarsuaataannut alapernaarsuutinut sisamanut Thetis-klassimeersunut ukiunik 40-ngajannik pisoqaassusilinnut, taarsiutaassapput.

Kalaallit Nunaata imartaani umiarsuarnik nutaanik nakkutilliisussanik sanaartortoqarnissaanut aningaasaliinissamut pilersaarutit, Issittoq pillugu illersornissamut isumaqatigiissutip ilaattut 2025-mi saqqummiunneqarpoq.

Danmarkip Issittumi Atlantikullu avannaani nakkutilliinera isumaqatigiissuteqarnikkut nukittorsarneqassaaq.

RITZAU