Savalimmiuni naalakkersuisoqatigiit nutaat naalagaaffimmit tapit annikinnerulersinniaraat
Savalimmiuni naalakkersuisooqatigiit nutaat Danmarkimit ukiumoortumik aningaasaliissutaasartut ikinnerulersinniarpaat, tamannalu naalakkersuisooqatigiilersut isumaqatigiissutaanni ullumi sisamanngornermi saqqummiunneqartumi atuarneqarsinnaavoq.
Savalimmiuni naalakkersuisooqatigiilersut ukiuni tulliuttuni sisamani atuunnerminni Danmarkip ukiumut tapiissutigisartagai 642 miliuunit koruunit 25 miliuunit koruuninik ilanngartinniarpaat.
Savalimmiuni decembarip arfineq pingajuanni inatsisartunut qinersisoqareerorlu partiit Javnaðarflokkurin, Tjóðveldi aamma Framsøkn naalakkersuisooqatigiilerput.
Naalakkersuisoqatigiilersut ullumimit sisamanngornermi atuutilersut Aksel V. Johannesenimit Javnaðarflokkurinimeersumik lagmandiuffigineqarput.
Isumalluuteqannginneruneq
Partiip Tjóðveldip siulittaasua Høgni Hoydal nunanut allanut tunngasunut ministerinngorpoq. Partiip Framsóknip siulittaasua, Ruth Vang aningaasaqarnermut nutaatut ministerinngorpoq.
Partiit Tjóðveldi aamma Framsókn Savalimmiut allanit isumalluuteqannginnerunissaanik kissaateqartuupput.
AAMMA ATUARUK Savalimmiuni qinersineq: Uku qulequttat pingasut sammineqarnerupput
Naalakkersuisoqatigiit isumaqatigiissummiipportaaq Savalimmiut silaannartaminnik namminneq aqutsilernissaannut kissaateqarneq, kiisalu akit qaffakkaluttuinnarnerat peqqutigalugu innuttaasunut akunnattumik isertitalinnut isertitakinnerusunullu akileraartarnikkut nioqqutissanillu akileraaruteqartitsinikkut oqilisaassinissaq.
Tamanna imaani pisuussutinik atuinermut akileraarutinik qaffaanikkut matussuserniarneqarpoq.
Savalimmiuni naalakkersuisoqatigiit nutaat ministerinik nutaanik sisamanngornermi aamma saqqummiunneqarput.
