Illersornissamut isumaqatigiissut pillugu tusagassiortunik katersortitsineq: Sakkussiorneq uagutsinnut pitsaanerpaavoq

Naalakkersuisut siulittaasuat, Jens-Frederik Nielsen (D) aamma ilisimatusarnermut nunanullu allanut naalakkersuisoq, Vivian Motzfeldt (S) tallimanngornermi ualikkut tusagassiortunik katersortitsipput, taakkulu Issittoq aamma Atlantikup Avannaa pillugit illersornissamut isumaqatigiissutip ilaa annerusumik oqaaseqarfigaat.

- Innuttaasut toqqissisimanissaat pingaarnerpaavoq. Tamanna tusagassiortunik katersortitsinermi matumani erseqqissaatigerusupparput, Jens-Frederik Nielsen oqarpoq.

Taamaammat taakku tusagassiortunik katersortitsinissamut aggersaaniarlutik isumaqatigiissummilu nutaami pissutsit tunngavigisallu oqaluttuariniarlugit aalajangerput.

Illersornissamut isumaqatigiissutip immikkoortuata aappaa kingullerlu oktobarip qulingat saqqummiunneqarpoq. Timmisartut nakkutilliissutit nutaat, timmisartuaqqat ungasianiit aquttakkat dronit aamma issittumi umiarsuit marluk nunatta isumannaatsuunissaanut illersornissaanullu nutarterinerusut, tusagassiortunik katersortitsinermi oqaatigineqarpoq.

Tamatuma saniatigut Issittumi Sakkutooqarfiup Nuummi qullersaqarfissaanut nutaamut kiisalu imaatigut kabelimut nutaamut aamma Nuummi Kangerlussuarmilu umiarsualiviit allilerneqarnissaannut aningaasanik immikkoortitsisoqarpoq.

Isumaqatigiissutip saqqummiunneqarnerata kingorna naalakkersuisut pingaartumik Naleqqap tungaanit isornartorsiorneqangaatsiarput.  

- Nuummi toqqaannartumik sakkussiaqarnerulernissaa quarsaarutigaara, Naleqqamit, Aki-Matilda Høegh-Dam illersornissamut isumaqatigiissutip saqqummiunneqarneranit ullut marluk qaangiuttut oqarpoq.

Saniatigullu borgmesterit, Avaaraq Olsen (IA) aamma Malik Berthelsen isumaqatigiinniarnernut peqataatinneqarsimannginnertik pissutigalugu naalakkersuisunut isornartorsiuipput. KNR-ip aallakaatitassiaani Oqalliffimmi naalakkersuisoqatigiit partiianit pingasut – Inuit Ataqatigiit, Siumut aamma Demokraatit – kiisalu illuatungiliuttut partiiat, Naleraq aamma taama isornartorsiuteqarput.

Vivian Motzfeldtilli ullumi tusagassiortunik katersortitsisoqarnerani partiit siulittaasui peqataatinneqarsimasut taakkulu isumaqatigiissummut sunniuteqarnissamut periarfissaqarsimasut erseqqissaatigaa.

- Nunatsinni partiit tamarmik siulittaasui ilisimatillugillu isumaqatigiissutip sinaakkutaanik ilisimatitsivugut. Tamatuma saniatigut kissaatiminnik oqaatiginninnissamut oqaaseqaateqarnissamullu periarfissaqarnikuupput. Periarfissaq partiit siulittaasuinut tamanut ammanikuuvoq. Taakkulu utimut nalunaarutaat aamma ilanngunneqarput, taanna oqarpoq.

Vivian Motzfeldtip (S) oqarnera naapertorlugu illuatungiliuttut partiiata, Naleqqap neqeroorfigineqarnini nammineerluni itigartitsissutigisimavaa.

- Erseqqissaatigerusuppara Naleqqap ilisimatitsinerup isumaqatigiinniarnerullu nalaani peqataaniannginnertik nammineq oqaatiginikuummagu, Vivian Motzfeldt oqarpoq.

Naleqqalli sapaatip akunnerata siuliani marlunngornermi tusagassiuutinut nalunaarutaani allatut nipeqarpoq, taakkulu Vivian Motzfeldt ingerlatsineq pillugu salluliornerarpaat.

Nutarsaaneq piviusorsiornerusoq

Naalakkersuisut isumaqatiginninniarnerit suliallu ingerlarnga sapinngisamik ammasumik unneqqarissumillu ingerlasimanerarpaat.

Paasissutissat allanut oqaatigeqqunngisat partiimi siulittaasunut angunneqarnikuupput, taakkulu partiimi ilaasortimi sinnerinut ingerlateqqinnissaat akisussaaffigigaat, Vivian Motzfeldtip (S) erseqqissaatigaa, taassumalu borgmesterit Inatsisartunilu ilaasortat allat isornartorsiuinerat innersuussutigaa.

- Illersornissamut isumaqatigiissut tuaviuussaanngilaq, piffissaq kingulleq atorlugu naammassineqanngilaq, taanna oqarpoq.

- Danmarkimik isumaqatiginninniarnerit isumaqatigiissutigineqartutulli ingerlallutillu immitsinnut ataqqeqatigiippugut. Ataqqinninnermik paaseqatigiittoqarpoq. Taamaattoqarsimanngikkaluarpat isumaqatigiissut pitsaasuusimanavianngikkaluarpoq.

Illersornissaq pillugu nutaamik isumaqatigiissuteqartoqarnissaa nunatsinnut aamma pisariaqarsimasoq, Jens-Frederik Nielsenip Vivian Motzfeldtillu aamma erseqqissaatigaat, isumaqatigiissummimi atortorissaarutitta pisoqalisut nutarsarnissaat aamma siunertaavoq.

- Illersornissamut akisussaaffik pingaaruteqarmat siunissami tigussagutsigu atortorissaarutit pisariaqartut nunatsinni piginissaat kissaatitta annerpaartarisimavaat, Vivian Motzfeldt oqarpoq.

Taamaammat atortorissaarutinut nutaanut ilinniarfinnullu aningaasaliisoqarnissaa pisariaqarpoq, uanilu Issittumi Sakkutooqarfiup Nuummi qullersaqarfia pillugu oqallinneq eqqaavaa.

- Atortorissaarutit qangali nutarsarneqartussaagaluarput, tamannalu maanna piviusunngortinneqarsinnaavoq, taanna oqarpoq.

Politikerit marluullutik isumaqatigiissut toqqissisimanermik isumannaatsuunissamik paasissutissanillu isumannaatsuutitsinissamik pilersitsinissaq pillugu isumaqatigiissutigineqartoq erseqqissaatigaat.

- Nunatsinnut aarlerinartoqanngitsoq oqaatigerusuppara, Jens-Frederik Nielsen oqarpoq.