Politikki

Qinersinermi appariaateqarnerujussuaq nuimasukippallaarneranik Aajap nassuiaraa

Inuit Ataqatigiinni nuimasut Aaja Chemnitzip ujartorpai, qineqqusaartorpassuarnulli qinerseqqinnermi nutaanngortoqarnissaanut piffissaq sivisusinnaavoq.

Allattoq Mads Malik Fuglsang Holm

marsip 13-at 2025 07:30

Nutserisoq Karla Heilmann, Jens Thorin

Inuit Ataqatigiit (IA) 15,3 procentimik kinguariaateqarluni marlunngornermi qinersinermi taasisartuminik annaasaqarnerpaavoq. Partiini annerpaanikuulluni maanna Demokraatinit Naleqqamillu anguneqarpoq.

Qinersisorpassuit allatut isumaqalersimanerat, IA-p tigussaasunik kukkusimanerani nassuiarneqarsinnaanngitsoq, Folketingimut ilaasortaq IA-meersoq Aaja Chemnitz isumaqarpoq. Akerlianilli IA-p qineqqusaartui, nuimasunik qinersisussanik kajungilersitsisussanik, amigaateqartoq erseqqissaatigaa.

- Qineqqusaartunik nuimalluartorpaalunnik amigaateqarunarpugut. Kalaallit politikkianni politikkiminngaanniit inuit nuimanerusut pingaarnerusartut nalinginnaasorujussuuvoq, Aaja Chemnitz KNR-imut taama oqarpoq.

IA tulliani qinersinissami siuariaqqukkumalluni, qinigaaffimmi nutaami partiimik ingerlatsisinnaasumik nuimasortaqassappat, qinigaaffimmi qaangiuttumi qinikkani nuimasut qiviartariaqarpai. Maanna qinigaasuni Nivi Rosing kisiartaalluni qinigaarlaajuvoq.

Qinersinermi inernerit

Qinigaanerpaat: Demokraatit 30 procentinit taaguunneqarput. Ukiut sisamat matuma siorna qinersisoqarmat partii 9 procentiinnarnit taaguunneqarpoq.

Naleraq qinersisut 25 procentiinit taaguunneqarluni taaguunneqarnerpaat aappaattut inissippoq. 2021-mi qinersisoqarmat 12 procentingajaannarnit taaguunneqarpoq.

Inuit Ataqatigiit 21 procentinit taaguunneqarpoq. Partii kingullermik qinersisoqarnerani 36 procentinit taaguunneqarsisoq kinguariangaatsiarpoq.

Siumut qinersisut 14 procentiinit taaguunneqarluni taaguunneqarnerit sisamaattut inissippoq – Siumut 2021-mi qinersisoqarneranut sanilliullugu aamma kinguariangaatsiarpoq – qinersisullu affaannik kinguariarluni.

Atassut 7,3 procentinit taaguunneqarpoq tamannalu Inatsisartunut kingullermik qinersinerup naligingajappaa.

Partiilu nutaaq Qulleq 1 procentiinnarnit taaguunneqarluni qinigaanngilaq.

Peqqissiminngitsoq

Aaja Chemnitzimmi Inatsisartunut qinigassanngortissanerluni eqqarsaatigisimagaluarpaa, taamaaliorsimagaluarunilu partiini immaqa qinersiseqarnerulersissimassagaluarpaa. Folketingimili ilaasortaanini attatiinnassallugu naggataatigut aalajangiuppaa.

Tamanna ullumikkumut peqqissimissutiginngilaa.

- Taamani aalajangernera suli allanngortinngilara, taanna oqarpoq.

Aaja Chemnitzilli Folketingimi ilaasortaaqataa Aki-Matilda Høegh-Dam (N) qinigassanngortippoq – iluatsitsilluarlunilu. Siumukkunni politikeriusimasoq qineqqusaartuni tamani qinigaanerpaanut pingajuuvoq. Taamaalilluni Naleqqap 12,5 procentimik siuariarneranut tapersiingaatsiarpoq.

Aki-Matilda Høegh-Dam 2.954-inik, tassa taasisuni 10 procentiinik taaguunneqarpoq. Taamaalilluni partiiminni siulittaasuni Pele Broberg 1254-inik taaneqartoq qaangerpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.