Qaqortumi Sisimiunilu nutaanik pinerluuteqarsimasunut inissiisarfiliortoqassasoq

Qaqortumi Sisimiunilu nutaanik pinerluuteqarsimasunut inissiisarfinnik pilersitsisoqassaaq. Tamatuma saniatigut Nuummi pinerluuteqarsimasunut inissiisarfik allilerneqassaaq.

Naalakkersuisut aamma danskit naalakkersuisui tusagassiuutinut nalunaarummi paasissutissiipput.

Namminersorlutik Oqartussat Danmarkillu aggustimi isumaqatigiissutaat inissiisarfinni inissanik nutaanik 70-inik ilaatigut pilersitsisussaq tunngavigalugu sanaartortoqassaaq.

Nuummi inissat nutaat 34-t pilersinneqassapput – 16-it ammasumi 18-illu matoqqasumi.

Qaqortumi pinerluuteqarsimasunut inissiisarfik nutaaq inissanut 30-nut allanngorarsinnaasunut inissaqartitsiviussaaq. Tassa pisariaqartitsineq aallaavigalugu ammasunik matoqqasunilluunniit inissaqassaaq.

Sisimiuni inissat allanngorarsinnaasut 25-t pilersinneqassapput. Illoqarfinni taakkunani marlunni pinerluuteqarsimasunut inissiisarfitoqqat nutaat piareerpata matuneqassapput.

Tamatuma saniatigut Nuummi pinerluuteqarsimasunut inissiisarfikoq 12-inut inissaqartitsiviulluni inissat nutaat pilersinneqarnissaata tungaanut ammaqqikkallassaaq.

Pingaaruteqarluinnartoq

Inissiisarfimmi inissat nutaat nunatsinni inissanut 45 procentimik amerliissapput.

Tamanna nunatsinni Pinerluttunik Isumaginnittoqarfimmut pingaaruteqarluinnassasoq, inatsiseqarnermut ministeri, Peter Hummelgaard tusagassiuutinut nalunaarummi oqarpoq.

- Oqallisiginninnerit Kalaallit Nunaanni Pinerluttunik Isumaginnittut massakkut unammilligassaasa aaqqinneqarnissaannut alloriarneq pingaaruteqartoq malunnartippaat, tassami inissiisarfinni piusuni inissaqartitsiniarneq sivisuumik artukkerneqarsimavoq.

Inatsiseqarnermut naalakkersuisup, Naaja Nathanielsenip (IA) inissanik nutaanik pilersitsinissamut maanna pilersaaruteqalernera aamma nuannaarutigaa.

- Inissaqartitsiniarnerup annertusarneqarnera pillugu inaarutaasumik isumaqatigiissut massakkut naammassineqarmat, Naalakkersuisut naammagisimaarinnittorujussuupput. Inissat nutaat katillugit 70-it malunnaatilimmik inissanik, massakkut siunissamilu pisariaqartinneqartunik, amerliliipput. 

Pinerluuteqarsimasunut inissiisarfinni inissat nutaat Danmarkip nunatsinni politiinut eqqartuussiveqarnermullu 2026-mit 2030-mut 850 millionit koruuninik aningaasaliissutaanneersut KNR-ip siusinnerusukkut allaaseraa.