Aningaasaatilissuit aatsitassarsiutileqatigiiffiat nikkelimik misissuilluni aallartittoq

Aatsitassarsioqatigiiffik Kobold Metals nunatsinni qillerilluni aallartittussanngorpoq.

Aatsitassanik misissuineq Qeqertarsuarmi pissaaq.

Nutaarsiassaqartitsivik Reuters taama aallaaserisaqarpoq.

KoBold Metals aningaasaatilissuarnit, tassaasunik Microsoftimik piginnittoq Bill Gatesimik, Amazonimik piginnittumik Jeff Bezosimik ilaatigut aningaasaliiffigineqarpoq.

Aatsitassarsiornissamut sumi qillerisoqarnissaanik ujarlernermi atortorissaarutinik nutaalianik dronenik atuilluni misissuisoqassaaq.

Aatsitassat mingutsitsiffiunngiutsut, soorlu kanngussaat, nikkelit, koboltit platinillu aatsitassarsioqatigiiffiup soqutigisarai.

Taakku biilinut innaallagiatortunut atorneqarsinnaapput.

AAMMA ATUARUK Bluejay Amerikamiut pisoorsuit aningaasaliisoralugit Qeqertarsuarmi saffiugassarnialersoq

Suliniut Kobold Metalsimik aatsitassarsioqatigiiffimmillu Bluejay Miningimit suleqatigiiffiusoq KNR-imi oqaluttuarereernikuuarput.

Aatsitassarsiornissamut suleqatigiinnissamut isumaqatigiissuteqarnermi KoBold Metals 51 procentit Bluejayillu 49 procentitnik piginneqatigiittoqassaaq.

Ruslandip Ukrainimut tinguaanerata kingorna aatsitassanik pingaarutilinnik allaaniit pilersuisoqalernissaa pingaaruteqartoq Bluejay Miningip pisortaa Bo Steensgaard oqarpoq.

- Aatsitassasiorfinnik nutaanik pilersuiffeqalernissamik pisariaqartitsineq pisuni ajuusaarnartuni paasinarsivoq. Taanna nutaarsiassaqartitsivimmut Reutersimut oqarpoq.

Assersuutigiinnarlugu nunarsuarmi nikkelimik pilersuinerup 10 procentia Ruslandimeerpoq.

Dundas atuisinnaanermut akuersissuteqalersoq

Diskomi suli aatsitassarsiulersaartoqanngikkallarmat Bluejay Mining Dundas Titaniumimi ukiuni tallimani aatsitassarsiortuuvoq – ukioq kingulleq decembarimi aatsitassarsiornissamik Naalakkersuisunit akuerineqarpoq.

Aatsitassarsiorfimmi sanaartorfissamut saffiugassanullu suliaqarfissanut aningaasaliisussanik Bluejay Mining ujartuileruttorpoq. Dundasimi aatsitassarsiorneq Qaanaap kujasissuani 80 kilometerinik, Thule Air Basemiillu 40 kilometerinik kangisissulimmi isorartutigisulimmiippoq.

Qeqertarsuarmili metallinik ujarlerluni assaanissaq piviusunngussappat, piffissaq sivisooq ingerlaqqaassaaq.

Suliap inuiaqatigiinnut avatangiisinullu kingunerisinnaasai pillugit nalunaarusiortoqaqqaassaaq, suliniut aallartissappat Naalakkersuisunit akuerineqaqqaartussamik

Suliniut aamma tamanut tusarniutigineqaqqaassaaq, tusarniaanermilu oqaaseqaatit Naalakkersuisunit suliarineqaqqaassallutik. Tamanna akuerineqassappat Bluejay piiaanissamut akuersissummik Naalakkersuisut aamma qinnuteqaqqaassaaq, Naalakkersuisut akuereqqaagassaannik.