Politiit umiatsiamik angalasunut: Qaqugu uteqqinniarnerlutit qanigisannut ilisimatitsissutigiuk

- Innuttaasut umiatsiamik aallarunik qaqugu angerlaqqinnissartik qanigisaminnut ersarissumik nalunaarutigisassagaat politiit kaammattuutigaat.

Sisimiunit umiatsiamik angalasunut qanigisaasumit politiit nalunaaruteqarfigineqarnerata kingorna, Kalaallit Nunaanni Politiit pigaartuisa pisortaat, Aputsiaq Hansen oqarpoq.

Umiatsiamik angalasut pilersaarut malillugu utinngimmata qanigisaasut ernumalerput.

SAR-imik ujaasinermik aallartitsisoqanngilaq, sunami tamarmi iluatsippoq, angalasummi ajoratik takkupput.

Imaatigut angalaniaraanni ernumasoqannginnissaa toqqissiviilliortoqannginnissaalu pinaveersaartinniarlugit aallannginnermi ersarissumik attaveqaqatigiittoqarnissaa piareersarluartoqarnissaalu politiit kaammattuutigaat:

- Soorunami silarlulertoqarsinnaallunilu aqqutaani ajornartorsiuteqartoqalersinnaavoq, taamaalillunilu kingusinaartoqarluni. Taamalu pisoqaratarsinnaanera pissutigalugu saniatigut nerisassaateqarnissaq, raadiukkut attaveqaateqarnissaq oqarasuaateqarnissarlu pingaaruteqarpoq, Aputsiaq Hansen oqarpoq.

- Sumiinnerup, sumunnarnerup qaqugulu angerlaqqinniarnerup ersarissumik nalunaarutigineqarnissaa eqqaamaneqartuaannassaaq.

Mianersorlutik ingerlagit

Nuummi ullormi kingullermi aqqusinikkut angallannermi aamma ajutoortoqarpoq, ajutoornermili akornusertoqanngilaq.

pingaartumik illoqarfiit pingaarnersaanni – Aputeqangaatsiarnera aqquserngillu quasarneri pissutigalugit biilertut mianersussasut politiit oqaatigaat.

- Sukkassuseq naammattusaarneqassaaq. Aamma naak assakaasut aasarsiutinut suli nikisinneqarsimanngikkaluartut. Aqqusinermi quasarsinnaavoq.