Pele Brobergip taarsiisoqarnissaa piumasaraa: "Mette, iliuuseqarnianngikkuit sussa takkunnak"
Naleqqap siulittaasuata Pele Brobergip Danmarkimi ministeriunerup Mette Frederiksenip spiralilersuinermut atatillugu utoqqatsernera, iliuuseqarnikkut malitseqanngippat, isoraa.
- Iliuuseqanngitsumik utoqqatsissutissarsiorneq inuiaqatigiinnik misiginerlutsitseqqinnerup assigiinnarpaa. Mette, naalagaaffik iliuuseqarnianngippat taarsiissuteqarnanilu angerlarsimaannarit, Pele Broberg tusagassiuutinut nalunaarummi allappoq.
Qulaajaaneq sivisuumik utaqqineqareerluni ippassaq saqqummiunneqareersorlu, taama oqarpoq - Mette Frederiksenip arnanut pineqartunut pisortatigoortumik utoqqatsereerneranit sapaatit-akunneri marlungajaat qaangiuttullu.
Ministeriuneq Katuami septemberip 24-ani utoqqatseqqinnissaa naatsorsuutaavoq.
Aningaasatigulli taarsiinermik malitseqanngippat ministeriuneq takkuttariaqanngitsoq, Pele Broberg isumaqarpoq
- Oqaatsitit iliuuseqarnermik tunngaveqanngippata namminissarsiorluni imminut takoqqusaarutaannaassaaq, utoqqatsernerlu iliuuseqarnermik malitseqanngippat maanga tikinnissat isumaqanngilaq, Pele Broberg isumaqarpoq.
Pele Brobergip arnat eqqugaasut, eqqartuussivikkut suliakkeeqqaarnatik, ingerlaannaq minnerpaamik 300.000 koruuninik taarsiiffigineqarnissaat piumasaraa.
Aammattaaq erseqqissarpaa spiralinik atuinerup kingunerisaanik inunngunngitsoortitsinerit inuiannik nungusaanertut naqissuserneqartariaqartoq.
- Inuiatta nungusariarsimaneri Mettep imaluunniit Danmarkip takoqqusaarutissarinngilaat, utoqqatserniinnarlu pineqartunut allamut saasaarutissaanngilaq. Kinguneqartumik iliuuseqartussaavusi, Pele Broberg allappoq.
