Minnesotami pinerliisutut pasisaq malersoreerlugu tigusaraat

Amerikami naalagaaffimmi Minnesotami politikerip nuliatalu toqutaanerannut pasisaq Vance Luther Boelter ullut marlungajaat malersugaareerluni tigusarineqarpoq. 

Taamak Minnesotap guvernøria Tim Walz tusagassiortunik katersortitsinermi uppernarsaavoq.

57-inik ukiulik Boelter Politikerinik Melissa Hortman aamma John Hoffman aapparisaannillu aallaannissimasutut arfininngornermi pasineqarpoq.

Melissa Hortman uiatalu ikilerneqarneqarnertik toqqutigaat.

Boelterip iliuuserisimasaatut ilimagisaat “Minnesotamik allannguisoq”, Tim Walzip tusagassiortunik katersortitsinermi oqaatigaa.

- Tamanna ileqqunngussanngilaq. Politikkikkut akerliunerit taamatut iliuuseqarfigisassanngilagut, BBC naapertorlugu tusagassiortunik katersortitsinermi guvernøri oqarpoq.

Tim Walzip pinerliisoqartoq siuliani oqaatigereerpaa.

Boelter Green Islemi angerlarsimaffiaffiata qanittuani sapaammi tigusarineqarpoq. Politikerit taakkua marluk aappaallu, Minnesotap illoqarfiisa anginersaanni Minneapolisimi Minnesotamit 60 kilometerisut ungasitsigisumi aallaaneqarput.

60-inik ukiulik John Hoffman aamma 55-inik ukiulik Melissa Hortman Senatimi aamma Repræsentanternes Husimi Det Demokratiske Partiimut naalagaaffimmi Minnesotami parlamentimut qinigaanikuupput.

Melissa Hortman uialu illoqarfiup ilaani Brooklyn Parkimi aallaaneqarput, senatorili John Hoffman nulialu illoqarfiup ilaani Champlinimi angerlarsimaffimminni aallaaneqarlutik.

Politikerit tatiginninnerat Boelterip atornerlullugu politiiusaarsimasoq,  Minnesotami pisortat isumannaallisaanermut ataatsimiititaanut ilaasortaq Bob Jacobson tusagassiortunik katersortitsinermi ataasinngornermut unnuaani oqarpoq.

- Tamanna killuussineruvoq, uagutsinnullu politiip ilisarnaataanik ataqqinaammik tigummisuusugut isumakulunnartorujussuuvoq, BBC naapertorlugu Bob Jacobson oqarpoq.

Reuters naapertorlugu, John Hoffman qulingiluariarluni aallaatissimasoq, suliaritinnini kingulleq qaangersimaleraa, peqqissiartulerlunilu, tusagassiortunik katersortitsinermi ataasinngornermut unnuaani Tim Walz paasissutissiivoq.

Boelter toqutsisutut toqutseriarsimasutullu unnerluutigineqartoq, pinerlinermulli suna pissutaanersoq naluneqartoq, politiittaaq paasissutissiissutigaat.

Pinerluttuusorineqartup biili ingerlassimasaani allaattaaviit politikerit atiinik allassimasullit nassaarineqarsimasut, politiit siusinnerusukkut paasissutissiissutigaat.

Boelter nittartakkakkut imminut qinersisartutut partiinik immikkut soqutigisaqanngitsuusoq.

Kristumiut kattuffiannut Revoformationimik taaguuteqartumut, Boelter nuliatalu ingerlatsisuunerat akileraartarnermut nalunaarutaanni takuneqarsinnaavoq.

 /ritzau/