OL-imut peqataaniarnerat
Sondre aamma Ukaleq Slettemark ukiumi unammiffiusumi angusarissaarput – tamannalu ukiuunerani OL 2026-mut peqataanissaanut aqqutissiuussisinnaalluni. Taakku marluullutik OL-imut peqataasinnaatitsisumik, wildcard-ip allattorsimaffianni 2-tut inissisimapput, taamaattumik taakku namminneq oqarnerat naapertorlugu qaangerneqarujussuarunik aatsaat qaangerneqarsinnaapput.
Qatanngutigiit angusarissaarlutik nunarsuarmilu sisoraaserluni ooqattaasarnermi pitsaanerpaat ilaanniilernissaannut anguniagaqarnerat malinnaaffigissallugu pissanganassaaq.
Ukiumi unammiffik pisoqarfiulluartoq
Ukiumi unammiffiusumi – qatanngutigiinnut aamma nunatsinni timersornermi tunngatillugu pissanganartorpassuaqarpoq.
Taamaammat qatanngutigiit ukiumi unammiffiusoq qanoq issimanersoq aperigaanni, akissutaat paatsuugassaanngilaq: ukiumi unammineq ajunngilluinnarlunilu nuannersorpassuaqarpoq.
- Unamminerni aatsaat taama angusarissaartigivunga. Timima qanoq pitsaanerpaamik iliorsinnaanera takusinnaalerpara, Sondre Slettemark tulluusimaarluni oqarpoq.
Ukiumilu unammiffik – Sondremut ilaatigut IBU Junior Cupimi ajugaasimasumut, Junior-EM-imi sølvinnassimasumut, VM-imilu unammeqataaqqaarsimasumut – kiisalu oqaluttuarisaanermi puigugassaanngitsumik Ukaleq peqatigalugu single mixed relayimut peqataasimasumut – ulapaarfiusimavoq.
Nunatsinni oqaluttuarisaanermi ilaalersut
Qatanngutigiit nunatsinnit eqimattanit siullerpaallutik sisoraaserluni ooqattaasarnermi nunarsuarmi pissartanngorniunnermi stafettimi peqataallutillu naammassivaat. Taamaalillutillu nunatta oqaluttuarisaanerani ilaalerlutik.
Unamminermi single mixed relayimi peqataaginnanngillat – taakkumi nunarsuarmi pikkorinnerpaanit nunanit allanit sisamaneersut aamma ajugaaffigaat.
- Kalaallit erfalasuat angusat allattorsimaffianni takullugu nuannerpoq. Neriuppunga nunanit angisuunit allaneersut takusimallugu eqqarsarsimassasut: Kikkunuku? Sondre Slettemark illalaarluni oqarpoq.
Angusaqarluarneq angusarissaannginnerunerlu
Ukaleq ukiumi unamminerup aallartinnerani ajoqusersimanini pissutigalugu angusarissaannginneruvoq. Tamanna pissutigalugu piffissap ilarujussuani peqataanngilaq. Tamannali uniinnassutiginngilaa, muminganilli.
- Uteqqinniarnissara angorusunnerpaavara. Ukioq unammiffiusoq imminut uteqqinniarnissaralu ilinniarfigingaatsiarpakka, Ukaleq Slettemark oqarpoq.
Naak angusaqarnerlukkaluarluni nammineq angusaqarnissani iluatsippaa, tamanna imminut timikkut tarnikkullu sapinngisani tamaat atorlugu uteqqissinnaaneranut misigilersitsivoq.
- Taamaalillunga ajoqusersimanera qujamasuutigaara. Ilikkagaqarfigingaatsiarpara, tamannalu pisariaqartissimavara, taanna oqarpoq.
Naallu tamarmik imminut tatigilluarlutillu neriulluaraluarlutik ukiuunerani OL-imut peqataanissamut suliassaqangaatsiartoq qularutiginngilaat.
- Nunatsinnut feriernikuuvugut. Sungiusarneq maanna aallarteqqilerpoq. Pilersaarusiussaagut, taamaalillutalu unammilerutta piareersimalluassalluta, Sondre Slettemark oqarpoq.
OL-imik takorluugaqarneq
Ukiuunerani OL 2026-mi peqataanissaq unamminissallu maanna anguniagaapput. Naallu suli qulakkiiveqqanngikkaluartoq takorluuillutik aallartissinnaapput:
- OL-imut anngussimanissara ingerlaffiusinnaasullu sapinngisamik amerlanerpaat ingerlaffigisinnaasimallugit neriuutigaara. Single mixed relayinik marluulluta unammeqqissinnaagutta pitsaanerpaaniillutalu – tamanna nuannerluinnassaaq, Sondre Slettemark naggasiivoq.
Ukaleq Slettemarkilu isumaqataavoq.
- Marluulluta inissisimalluarpugut. Suna sulissutigissanerlutigu ilisimavarput. Maanna isumatusaartumik sungiusarnissamut nuannaaginnarnissamullu tunngavoq. Ajunngikkuttami – taama pitsaanerpaamik takutitsissaagut, taanna oqarpoq.
