Ukioq ataaseq sinnerlugu ammarniarneqareersorlu, ullumikkut pisortatigoortumik nalunaarutigineqassaaq: Canada Nuummi konsulateqarfimmik tallimanngorpat ammaassaaq.

Tamanna Canadap Issittumi nunanut allanut periusissiaanut ilaavoq, taannalu Issittumi suleqatigiinnermik nukittorsaassaaq. Canadap nunanut allanut ministeria Anita Anand, Nuummi ammaanersiornermut peqataasussaq, naapertorlugu Issittumi tamarmi najuunneq Canadap annertusarniarpaa.

- Canada nammineq issittumiippoq, issittumilu oqartussaanerup illersorneqarnissaa Canadamut pingaaruteqarluinnarpoq, taanna oqarpoq.

Issittumittaaq nunat ataatsimoorluarnissaat imminnullu tapersersoqatigiinnissaat pingaaruteqartoq, nunanut allanut ministeri nangippoq.

- Nuummi konsulateqarfimmik ammaaneq Kalaallit Nunaanni Danmarkimilu innuttaasunut Canadap ukiorpassuarni suleqataasimaneranik pimoorussisuusumik ersersitsinissaq siunertat ilagaat. Issittumi nunat suleqatigiinnerat inuiaqatigiitta ataqatigiinnerulernissaannut Issittumillu illersuinerup nukittorsarnissaanut iluaqutaassasoraarput, Anita Anand oqarpoq.

Navianartorsiortitsisunut illersorniarluta ataatsimuussaagut

Naak siornaalli decembarimi konsulaateqarnissaq sulissutigineqarsimagaluartoq, Kalaallit Nunaata maanna pissanganartorsiornerata nalaani ammarneqalerpoq.

Kalaallit Nunaata USA-mut ilaasariaqarnera pillugu USA-p præsidentia Donald Trump oqartuarpoq.

Canada aamma præsidentimit soqutigineqarpoq. Canadap nunap immikkoortuisa 51-inngortinneqarnissaat Trumpip arlaleriarluni oqaatigaa. Canadami naalakkersuisut taamattoqarnera assuarilluinnarpaat.

Canadap Kalaallit Nunaat Danmarkilu tapersersorai, Anita Anandittaaq erseqqissaavoq.

- Danmarkimut Kalaallit Nunaannullu qanittumik attaveqarnerput nunattalu inoqqaavisa ataqatigiinnerat pissutigalugit qanimut attaveqarluinnarpugut, taanna oqarpoq.

Trumpip Kalaallit Nunaat pillugu oqaaserisai nunanut allanut ministerip qanoq isumaqarfiginerai aperineqarami, akissutaa erseqqippoq.

- Naalagaaffiit namminneq aalajangiisinnaatitaanerat nunallu inissisimaffianik ataqqinninneq pingaartipparput. Tassa taamaappoq, Anita Anand oqarpoq nangillunilu:

- Issittup illersorneqarnissaata attatiinnarnissaatalu pingaaruteqarnera naqissuserusupparput. Arlalinnik aarlerinartoqarpoq, ilaatigut russit attaveqaasersuutai avannamut issittup killeqarfiata tungaanut siaruaakkiartortut eqqarsaatigalugit. Taamaattumik erseqqissumik oqaatigisariaqarparput: Issittoq ukiorpassuarni navianartorsiortinneqarpoq. Avatangiisinut illersornissamullu tunngasutigut navianartorpassuaqarpoq, navianartorsiortitsisunullu taakkununnga immitsinnut illersorsinnaajumalluta issittumi inuiaqatigiittut ataasiussuseqarluta ataatsimoornissarput qulakkeertariaqarparput.

Canadap ministeriunerata Mark Carneyp Canadap Danmark tapersersoraa, qaammatip siuliani aamma oqaatigaa.

Eqqissisimajuartut

Nunanut allanut politikkimik ajornartorsiornerup kingunerisaanik Kalaallit Nunaanni sakkutoorpassuit sapaatip-akunnerini kingullerni takussaapput. Nunat Natomut ilaasortaasut arlallit qallunaanit siulersorneqarlutik Kalaallit Nunaanni sakkutooqarnikkut sungiusarnermut Arctic Endurancemut peqataapput.

Canadali peqataasut ilaanniinngilaq. Canada sooq peqataannginnersoq Anita Anandip itisiliiffiginngilaa, Natolli Issittumi sungiusarnerunissaa Canadap kissaatigigaa, taanna oqarpoq.

- Canada Natop sungiusarnerinut peqataasarpoq, Canadattaaq Issittortaani nammineq sungiusartarpugut. Natop Issittumi sungiusarnera tapersersorluarparput, tamassumalu Natop aaqqissuussaaneranut ataavartussanngornera neriuutigaarput. Natop Issittoq samminerusariaqaraa qangali oqariartuutigaarput, taanna oqarpoq.

Anita Anand, saassussisoqassagaluarpat Kalaallit Nunaat Canadamit qanoq tapersersorneqarnissani naatsorsuutigisinnaavaa?

- Natomut ilaasortaavugut, Natomilu najoqqutassiat tamaasa, ilaatigut allaaserisami 5-imi allassimasoq ilanngullugu, malissavavut, Natomut ilaasortaasumut ataatsimut saassussineq nunanut ilaasortanut tamanut saassussinertut isigineqarnissaanut allaaserisamut innersuussilluni oqarpoq. Nangipporlu:

- Pissutsilli eqqissisimanarnerulerput (Trumpip Kalaallit Nunaat pillugu anguniagai eqqarsaatigalugit, aaqq.), eqqissisimajuarnissarpullu uagutsinnut pingaaruteqartorujussuuvoq. Natomilu suleqataasut peqatigalugit navianartorsiortitsinernut illersornissatsinnut isumannaallisaanermullu tunngasunik suleqatigiinnitta qulakkeernissaa pingaaruteqaqaaq, nunanut allanut ministeri oqarpoq.

Canadamittaaq generalguvernøri Mary Simon Nuummi konsulateqarfiup ammarneqarnerani peqataassaaq.  Anchoragemi Alaskamiittumi Canada ukioq manna kingusinnerusukkut aamma konsulateqarfittaassasoq, Anita Anand oqaluttuarpoq.

Canadap saniatigut aamma Frankrigip Nuummi konsulateqarfiata ammarneqarnera tallimanngornermi nalliussineqassaaq.