Nutaarsiassatsialak: Maliina Ittuk februaarimi marsimiluunniit Qaqortumukassaaq
Ilaasartaat ukiup aappaa affaata matuma siornata piareereersimasussaagaluarpoq. Ilaasartaalli suli Faaborgip amutsivianiippoq.
Suna pineqarnersoq nalornissutigigukku Maliina Ittuk Disko Linep ilaasartaataa nutaaq pineqarpoq.
Maannali – kiisami – nutaarsiassatsialaqangajalersoq, Disko Linep pisortaanera, Michael Sloth Højgaard naliliivoq:
Ateq Maliina kalaallit seqineq qaammallu ”Aningaaq Maliinalu” pillugit oqaluttuaatitoqaanneersuuvoq.
- Taama ajoquteqartiginera uggornartorujussuuvoq. Kisianni maanna angusaqarluarpugut. Umiarsuarmik angalanermi misiliutit kingulliit januaarimi misiliutigissavagut, Qaqortumullu februaarimi marsimiilluunnit ingerlaassalluta, taanna KNR-imut oqarpoq.
Battereqarfiani ajornartorsiuteqartoq
Ilaasartaatip nutaap kinguaattoornera pillugu pisortaq siullermeerluni nalunaaruteqanngilaq. Kingullermik ilaasartaat 38 meterinik takissuseqartoq Faaborgimi amutsivimmiittoq aasaq nalunaarutigaa.
Pisortaq oqarnera naapertorlugu – ilaasartaatip kinguaattoornerani – ilaasartaat innaallagiatortuullunilu ikummatissatortuunera pissutaavoq.
- Teknikkikkut ajornartorsiutit arlallit erserput – pingaartumik innaallagiamut battereqarfianullu atatillugu. Battererujussuaq pineqarpoq, taannalu nukissiuuteqangaatsiarluni. Taamaattumut matut silaannarissaarfiinullu tunngatillugu piumasaqaateqartoqangaatsiarpoq. Sanaartornerup ingerlanerani piumasaqaatit aamma sukannernerulersinneqarput – taamaammat matut silaannarissarfiillu taarsertariaqarlutigit, Michael Sloth Højgaard oqarpoq.
"Uggornartorujussuusoq"
Ilaasartaat naammassiguni Qeqertarsuup Tunuani angallassisalissaaq. Ilaasartaatilli ilulissat akornanni angallassilinngikkallassaaq. Ilaasartaammi nunatta kujataani angalaqqaassaaq, Maliina Ittummi Qaqortup, Narsarsuup kujataanilu umiarsuaviit allat akornanni aappaagu angalaqqaassaaq.
Disko Line nunatta kujataani imaatigut angallassinermut kiffartuussinissamik isumaqatigiissuteqareerpoq. Qaqortumilu mittarfittaassaq aamma utaqqisaavoq – taanna 2026 naappat aatsaat ammassaaq.
- Ilaasartaat 2025 tamaat nunatta kujataaniitseqqaassavarput. Mittarfik ammarpat imaatigut angallassinerup ilarujussua periarfissaarutissaaq, taamaammat Maliina Ittuk Qeqertarsuup Tunuanut nuutsissavarput, pisortaq oqarpoq.
Piffissaliussap nikinnginnissaa qulakkeersimaviuk?
- Taama pisoqarnera uggornartorujussuuvoq, ilaasartaatimmi amutsivimmiiginnarani angallassilernissaa kissaatigilluinnararput.
Maliina Ittup 113-inik ilaasoqarsinnaavoq.
