Nunatta annersaani interneteqarneq akikillisoq

Tusassimi interneteqarneq akikinnerulerpoq.  

Illoqarfinni nunaqarfinnilu arlalinni akikillipput. Aamma illoqarfinni minnerni nunaqarfinnilu 50-ini sukkanermik interneteqartoqarsinnaalissalluni.  

Tusass tusagassiuutinut nalunaarummi allappoq. 

- Uagutsinnut pingaaruteqarluinnarpoq nalunaarutigisinnaanngorlugu nunatsinni atuisunut akit appasinnerusut, atuisuuffiillu sukkanerusut aammalu ilaannut akikinnerullutillu sukkanerusunik atuisuuffinnik pissarsisinnaanngormata,atuisunut kiffartuussinermilu pisortaq Nikolaj Christoffersen tusagassiuutinut nalunaarummi oqarpoq. 

Aasianni, Maniitsumi, Narsami, Nuummi, Qaqortumi, Sisimiuni, Ilulissani, Nanortalimmi, Paamiuni Qasigiannguanilu atuisuuffik akikinnerpaaq 100 koruuninik akikillivoq, tassa 399 koruuninngorluni.  

Atuisuuffimmilu akisunerpaami 300 koruuninik akikillivoq, taamaattumik maannamiit 799 koruuninik akeqalissaaq.  

- Aningaasarsiornitta patajaatsumik ingerlanerata ukiunilu kingullerni aningaasaliissutit aallaavigalugit periusissiatsinni atuisunut iluaqutaasumik iliuuseqarnitsigut pitsanngoriartitsisinnaalernermik periarfissaqalersippaatigut, pisortaaneq Jonas Hasselriis tusagassiuutinut nalunaarummi oqarpoq: 

- Internetimut atuisuuffiit nutaat aqqutigalugit atuisunut naleqarnerusumik tunniussisinnaanissatsinnik iliuuseqarsinnaalersimavugut, akigititanik appaalluta attaveqaatinillu sukkanerulersitsilluta.

Illoqarfinni minnerni nunaqarfinnilu 32-ni, soorlu Arsummi, Qeqertarsuarmi, Upernavimmi Qeqertamilu atuisuuffiit pingasut akikillipput. Aamma interneti 30/5 Mbit-imiit 40/10 Mbit-imut sukkaninngussaaq.

Taakkua saniatigut, nunaqarfiit 18-it sukkanermik akikinnermillu interneteqarsinnaalissapput. 

Ukiut Tusassimut ingerlalluarfiusut

Tusassip oqarasuaatinut angallattakkanut atuisuuffinnik akittuinngikkaluarluni mobildatanik maajimi atuisinnaanerulersitsivoq.  

2025-mi akileraaruteqannginnermi rekordiliilluni 180 millionit koruuninik iluanaaruteqarpoq. 

Tusassip iluanaaruteqarnini saqqummiutiutigalugu atuisuuffinnik 2026-mi akikilliliissalluni nalunaaruteqarpoq.  

Atuisunut kiffartuussinermilu pisortap Nikolaj Christoffersenip, Tusassip nioqqutinik pitsanngorsaajuarnissaa, tusagassiuutinut nalunaarummi oqaatigaa:

- Tamatumalu saniatigut atuisuuffinnut pitsanngorsaanerit suli ingerlanneqarput, tassa ukiap ingerlanerani qaammataasatigut attaveqaateqarfinni suli pitsanngorsaaneq ingerlanneqassammat. 

Tusassip EU-mik Danmarkimillu suleqateqalerneq, soorlu Qaanaami Savissivinnilu qaammataasatigut attaveqaateqarfinni pitsaanerusumik interneteqalersitsissasoq septembarimi nalunaarutigaa.  

Tasiilami Ittoqqortoormiiniluunniit internetip akikillinissaanut sukkanerulernissaanulluunniit tunngatillugu tusagassiuutinut nalunaarummi allaqqasoqanngilaq.  

- Nunatsinni sumiiffinni assigiinngitsuni attaveqaatitigut tunngavissat assigiinngitsuupput, taamaattumik pitsanngorsaanerit nunap immikkoortuini tamani assigiinngillat, Nikolaj Christoffersen oqarpoq.

Akigititaalersut oktobarip aallaqqaataani atuutilerput, akikinnerusumillu atuisuuffeqalersinnaanerluni paasiniaraanni Tusass.gl-imut iserluni misissuisoqarsinnaavoq.