Nunatsinni peqqinnissamik suliaqartunut qaamaneqartoq
Sanami peqqinnissamik suliaqartut pakatsisimasut nunat tamalaat akornanni sulisartut ulluanni, maajip aallaqqaataanni Inatsisartut allaffeqarfiata tungaanut ingerlaaqatigiipput, taakkulu oqariartuutaat ersarippoq: Maannakkut isumaqatigiissuteqarfigineqarusuppugut.
Ukiorlu ataaseq sinnerlugu qaangiuttoq nutaamik isumaqatigiissuteqartoqarnissaanut takussutissaqalerpoq.
Tassami Peqqissaasut Kattuffiata (PK) aamma Namminersorlutik Oqartussat akornanni isumaqatigiinniarnerit maajip arfineq-pingajuanni nangeqqinneqarput. Ken Jensenillu oqarnera naapertorlugu isumaqatigiissut nutaaq naammassingajalersinnaavoq.
- Angusaqarnermik pappiaqqamik taasatsinnik suliaqarluta ilaasortatsinnut paasissutissiissutigisinnaasimavarput, Ken Jensen oqarpoq, nangillunilu:
- Tassa imaappoq suliaqarnitsinni isumaqatigiinniarnermi naammassisagut tunngavigalugit allaganngortitsisinnaalersimavugut.
Nunatsinni peqqinnissamik suliaqartunut nutaarsiassatsialaqarpoq. Isumaqatigiissuteqartoqarnissaata amigaataanera pissutigalugu akissarsianut tunngatillugu sinaakkutit ersarissimanngillat. Aaamma sulinermi akunnerit, sulinngiffeqarneq soraarnerussutisiassallu aamma sunnigaasimapput. Tamanna qularnermik aamma sulisunik attassiniarnermik sulisussarsiorniarnermullu ajornakusoortoqarneranik kinguneqarsimavoq, Ken Jensen oqarpoq.
Taassumali isumaqatigiissut qaqugorpiaq piariissanersoq oqaatigisinnaanngilaa – suliarli sapinngisamik sukkasuumik ingerlanneqarnerarpaa.
- Allaqqissaarineq nalinginnaasumik ullunik 14-inik sivisussuseqartarpoq. Tamatuma kingorna taasissutigineqartussanngortinneqassaaq, tamanna ullunik 20-nik sivisussuseqarsinnaavoq. Taamaammat tamanna piffissaliissutaapajaarsinnaavoq, taanna oqarpoq.
Isumaqatigiissuteqarnissaq piumasaqaataasoq
Ken Jensenip oqarnera naapertorlugu isumaqatigiissut annertullutillu assigiinngitsorpassuupput, taakku illuatungeriittut misissoqqissaassavaat. Isumaqatigiissuteqartoqassatillugumi pissarsiniaraanni ilaatigut tunniussaqartoqalaartoqartariaqartartoq, taassuma oqaatigaa.
- Pissarsiarerusutanik pissarsinngitsoortoqartuaannartarpoq. Imaluunniit isumaqatigiinngissutit isumaqatigiissutigineqarallartariaqartarput, naak pitsaanerpaarpasinngikkaluartut. Isumaqatigiinniarnerit taamaattarput, Ken Jensen oqarpoq, nangillunilu:
- Tunniussaqalaarlunilu tigusaqalaartoqartarpoq. Ilaasortat pitsaasumik piviusorsiortumillu isumaqatigiissuteqarfigineqarlutik misiginissaat pingaarnerpaavoq. Tassa isumaqatigiissut akissarsiaqarnerutitsisoq aamma suliffimmi atugassarissaarnerutitsisoq.
Qanittumi ulluliisoqassasoq
Naak isumaqatigiissuteqartoqangajaleraluartoq, Ken Jensenip suut tamarmik qaqugu inissinneqassanersut isumaqatigiissullu naammassineqarsimasoq qaqugu saqqummiunneqassanersoq suli nalunarnerarpaa.
- Ataatsimiinneq pitsaasuullunilu angusaqarluarfiusoq oqaatigisinnaavara. Angusanik allagaqarnissarput taannalu taasissutigineqartussanngortinneqangajalissasoq paaseqatigiippugut, taanna oqarpoq.
