Politiit ullormut nalunaarutaat: Imminut toqunnissamut sioorasaarinerit tillinniarnerillu politiit suliaanni suli initusut
Kalaallit Nunaanni Politiit sapaatip akunnerata naanerani imigassartortoqarneranut atatillugu pisunut sulianullu allanut atatillugu katillugit 57-inut ornipput. Tamatuma saniatigut imminut toqunnissamik sioorasaarnerit pillugit sianernerit 16-it orniguffigaat.
PIgaartut pisortaata nalunaarsuinera naapertorlugu politiit tallimanngornermit sapaatip ullaavata tungaanut suliat 32-t aallartinneqarput.
Pigaartut pisortaat Preben Kleist oqarpoq:
- Angerlarsimaffimmi eqqissiviilliortitsinerit 17-it orniguffigaagut. Tamatuma saniatigut pisut arfineq-marluk meerartaqarput. Taavalu nakuusernerit pillugit suliat qulit suliarillutigit.
Tillinniartoqaqattaaginnartoq
Naalli suliat annerusutut oqaatigineqarsinnaanngikkaluartut Nuummi politiit sulineranni tillinniarnerit suli initupput.
Assersuutigalugu unnuaq Arnat Igdluannut Kongevej 6-imut tillinniartoqarpoq, pinerluuteqartoq igalaat saavat aseroriarlugu isersimavoq.
- Tillinneqartut suli ilisimanngilagut. Kisianni unnuaq ataatsinit ullaaq nalunaarfigineqarnitta tassa nalunaaqutaq 08.10-p tungaanut takunnissimasinnaasunik amigaateqarpugut, Preben Kleist paasissutissiivoq.
Tillinniartoqarneri allat marluk sapaammi ullaassakkut nalunaarutigineqarput. Aappaa Charoen Pornimut tillinniarneruvoq, pinerluuteqartorlu igalaakkut isersimalluni.
- Aningaasanik pappiaqqanik aggornikunillu tillittoqarsimasoraarput. Suli ilisimannittussarsiorpugut. Alarmi 06.35 aallartippoq, pigaartut pisortaat oqarpoq.
Tillinniarnerit pingajuat iffiorferalammut Blok O-miittumut tillinniarneruvoq, pinerluuteqartorlu tassani nivaataq atorlugu isersimalluni.
- Piginnittoq oqaloqatigaarput, taannalu amigaatinik allattuillunilu taarsiissuteqartoqarnissaanik piumasaqaateqassaaq. Kisianni tillitaqartoqarsimarpasinngilaq, Preben Kleist oqarpoq.
Politiit takunnissimasinnaasut paasissutissaateqartut saaffiginninnissaannik kaammattuuteqarfigaat.
