Nukappiaqqat angutillu inuusuttut aallartitsinissamut takorluukkaminnut ikiorneqartut

Suliniaqatigiiffiup Mind Your Own Businessip ikiuunneratigut suliffeqarfeeqqat marluk nunatsinni aallartipput.

Allattoq Dora Evaldsen

juunip 20-at 2024 15:33

Suliniaqatigiiffik Mind your own business - Kalaaallit Nunaat nukappiaqqanik angutinillu inuusuttunik ikorfartortarialinnik namminneq suliffeqarfimmik aallartitsinissaannut ikiuiniarpoq.

Suliniaqatigiiffik nukappiaqqanut inuusuttunut saqqummiisunut Business Awardimik Nuummi nersorinninniaqqammerpoq.

Mind Your Own Business tusagassiuutinut nalunaarummi allappoq.

Mind your own business, naalissarlugu MYOB, Maria Kavita Nielsenimit suliniaqatigiiffimmi maanna pisortaasumit Danmarkimi 2010-mi pilersinneqarpoq.

MIND YOUR OWN BUSINESS

Nukappiaqqat 13-init 21-nut ukiullit nammineq suliffeqarfeeqqamik aallartitsinissaannut qaammatini arfineq-pingasuni ilinniartinneqartarput. Peqataasut immikkoortunut agguataarneqartarput: Sulisoqarneq HR, aningaasaqarneq, tunisassiorneq, tuniniaaneq aamma attaveqaqatigiinneq pilerisaarinerlu.

Mind Your Own Business – Kalaallit Nunaat 2019-imi siullermeertumik ingerlatsisimavoq mannalu 7killugu nukappissat 63-it ingerlataqartissimallugit.

Qaammatini arfineq-pingasuni ilinniartinneqarnerat Business Awardimik aaqqissuussinermi peqataasut suliffeqarfeeqqaminnik saqqummersitsisarput.

Als Research-imit 2023-mi naliliinermit nalunaarusiap Mind Your Own Business-imi peqataasut 59 procentii pikkoriffeqarnermut imminnut tatiginerulersimasutut misigisimasut inerniliissutigineqarpoq, peqataasullu 70 procenti anersaakkut annerusumik minnerusumilluunniit inuunerinnerulersimallutik.

Taamatuttaaq naliliinermi paasineqarpoq nukappissat affangajaasa sutigut ilinniagaqarnissartik paasisaqarfiginerusimagaat, 39 procentiisa inuunerminni sunik suliaqarusunnerlutik paasilluarsimagaat.

Allisiguk

Tuborgfondillu aningaasaliineratigut suliniut 2019-miilli Nuummi aamma aaqqissuunneqarsinnaasimavoq.

- Sæsonit arfinillit aqqusaareerlutigit Kalaallit Nunaanni pilersitap naleqarluarnera takusinnaavarput, suliniummik ataqatigiissaarisoq Natuk Rosing Fleischer oqarpoq.

- Mind your own business-mi peqataasut ilinniagaqarnissakkut suliffeqarnissakkullu periarfissanut tappinnerulersinniarneqarput- pingaarnertullu siunissami periarfissatigut isumalluarnerulernissaat nukittorsarneqarluni, MYOB-mi ataqatigiissaarisoq Nick Olsen oqarpoq.

Kavaajaq tujuulullu nasaasalik

Suliffeqarfeeqqat marluk upernaaq manna pilersinneqarput. G-Grown aamma Try 1, taakkulu tamarmik oktoberimi 2023-miilli qasusuillutik ingerlatsisimapput.

G-Grownimik ingerlatsisut kavaajaq Varsity jacket pilersissimavaat, Try 1-miittullu tujuuluk nasaasalik kiateerarlu namminerisamik ilisarnaasigartik pilersissimallugu.

- Nuannernerpaavoq tullissaani nutaanik misiliileruma misilittakkanik tunngavissaqalerama. Suliaqarniartillunga sapiinnerulersimavunga, ittoorpallaarnanga ammanerulersimavunga. Ivik Wille Majoriami atuartoq oqarpoq.

Suliffeqarnissamut ilinniagaqarnissamullu ikorfartortariallit qanillisaatitut iliuuseqarfigineqarneranni sunniutit pitsaasut uppernarsarneqartut, Mind Your Own Business-imik pilersitsisoq tassanilu pisortaasoq, Maria Kavita Nielsen, oqarpoq.

Taassumalu nukappisssat naaammassisaat tulluusimaarutigai. Taasuma pilersitani pinaveersaartitsinermut tapertaasutut isigaa. Taamaammat Naalakkersuisut kommuunillu tapersersuinissaat ujartorpaa.

- Peqatigiilluta inuusuttut suli amerlanerusut inuunermi pitsaasumik periarfissaqartissinnaavagut. Maria Kavita Nielsen oqarpoq.

Mind Your Own Business 2019-mili aallartimmalli nukappissat 63-it peqataasimapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.