Narsarmijit: Suuna paarnanik maanna tunisisinnaanngorpoq

Kujataani nunaqarfiit ilaanni Narsarmijini paarnanik nuniattartut ilaat nuannaajallaatigisaqarpoq. 

Maannami nunaqarfimmini Pilersuisumut paarnanik tunisisinnaanngoqqavoq.

- Soorunami iluatsitsivugut tassuuna, qujanaqaat, Suuna Mikaelsen nunaqarfimmi 73-inik innuttaqartumi Narsarmijineersoq, taama oqaluttuarpoq.

Kujataanimi nunaqarfinni marlunni nuniattartunut, Alluitsup Paani aamma Narsarmijini, Pilersuisumut tunisisinnaaneq periarfissaalerpoq.

Tamanna pivoq Kommune Kujalleq Namminersorlutik Oqartussanit nunaqarfinnut siuarsaanissamut 1,1 million koruuninik aningaasaliiffigineqareersoq. Kommunillu 200.000 koruunit illuartissimavai, taakkualu Innovation South Greenland A/S-ip suliniummut atorsimavai.

Suliniut Innovation South Greenland A/S-ip aamma Pilersuisoq A/S-ip kiisalu Neqi A/S-ip suleqatigiinnerisigut piviusunngorsinnaasimavoq.

- Taama aaqqissuigutta Neqi A/S qanoq isumaqarnersoq tusarniaaffigigatsigu, Erik Kielsen Innovation South Greenland A/S-imi siunnersorti oqarpoq.

- Tassani paasivarput Neqi A/S-ip aamma siunertarigaa paarnat kigutaarnallu atorlugit ukioq manna marmeladeliortalerniarlutik, tamaalilluta suliniummi tassani naaperiataarpugut, oqarpoq.

Maanna paarnanik nunaffiuvoq

Pilersuisorlu, paarnanik tigooraasuusoq, suleqataasimanngikkaluarpat suliniutip piviusunngortinnissaa ajornakusoorsimassangaluarpoq.

- Pilersuisummi Alluitsup Paani aamma Narsamijini pisiniarfii paarnanik tigooraasuupput, Erik Kielsen oqarpoq. 

Suuna Mikaelsenillu oqarnera naapertorlugu paarnat kigutaarnallu maanna kusatseruttorput.

- Uagut aamma siuleqqiutiliaralugillu marmeladeliarisarpagut. Mamaqaat, oqaluttuarpoq.

Innovation South Greenland A/S-imiit neriuutigineqarpoq Narsarmijit aamma Alluitsup Paata eqqaani nunaqarfinni qanittuni nuniattartut nunaqarfiit taakkua marluk Pilersuisuinut nuniaaminnik tunisisarumaartut.

- Nunaqarfinni innuttaasunut tusarniaalluta angalagatta tamanit tigulluarneqarpoq. Ingammik nunaqarfinni paarnaqarluarlunilu kigutaarnaqarluartartuni, Erik Kielsen oqaluttuarpoq.

Narsarmijiminilu paarnat kigutaarnallu nuniannissaannut piffissaq kingulleq maanna ingerlaleruttorpoq. Taamaammat paarnat kigutaarnallu unnuami qerisalinnginneranni Suuna Mikaelsen nunialluartaarpoq. 

-Piffissanngorpoq massakkut nuniannissamut, qaaralinnginneranni piumanerusaqaagut, massakkut imaalereerami pujorlunilu siallertarami qaaralinnginneranni katersuipallattariaqarpugut, Suuna Mikaelsen oqaluttuarpoq.

Paarnat kilomut 45 koruuneqartut, kigutaarnat kilomut 50 koruuneqarput. Narsarmijimini innuttaasut oktobarip qulingiluaata tungaanut tunisisinnaasut, Alluitsup Paani tunisisinnaaneq oktobarip 15-ata tungaanut periarfissaassaaq.

Ersarissaassut: 09.09.2021 nal. 09.26 suliniummut aningaasaliissutit suminngaanneernersut KNR-imit allaaserisami ersarissarneqarput.