Naalakkersuisuusimasunut akissarsiassat millionit koruunit arlallit
2,1 millionit koruunit.
Marsimi qinersinerup kingorna nutaanik naalakkersuisunngortoqarmat, naalakkersuisuusimasut arfiniliusut naalakkersuisutut atorfimminniikkunnaaramik taamak amerlatigisunik katillugit tunineqassapput.
Naak naalakkersuisut nutaat naalakkersuisunngoreeraluartut, naalakkersuisuusimasut suli naalakkersuisutut aningaasarsiaqarput.
Taama pisoqarnerani qaammammut 78.819,13 koruuniupput – akissarsiassap qaffasissusaa 2022-meersoq, isumaqatigiissutip nutaap atuutilinngikkallarneraneersoq.
Tulliuttumi qaammatini arfinilinni ilaasortaajunnaarnersiaqartinneqassapput:
Erik Jensen (S), Aningaasaqarnermut Akileraartarnermullu Naalakkersuisuusimasoq.
Jess Svane (S), Isumaginninnermut, Suliffeqarnermut, Nunamullu Namminermut Naalakkersuisuusimasoq.
Kalistat Lund (IA), Nunalerinermut, Imminut Pilersornermut, nukissiuutinut Avatangiisinullu Naalakkersuisuusimasoq.
Tassa ukiup affaa sinnilaarlugu, katillugit 473.000 koruuninit ikinnerunngitsut akissarsiaritinneqassapput.
Qaammatini pingasuni akissarsiaqarneq
Taakkua saniatigut naalakkersuisuusimasut pingasut, Peqqissutsimut Naalakkersuisuusimasoq Agathe Fontain (IA), Piniarnermut Aalisarnermullu Naalakkersuisuusimasoq Kim Kielsen (S), aamma Ineqarnermut Attaveqaasersuutinullu Naalakkersuisuusimasoq Hans Peter Poulsen (S), qaammatini pingasunittaaq akissarsiaqartinneqassapput.
Tassa qaammatit pingasut sinnilaarlugit, katillugit 236.000 koruuninit ikinnerunngitsut naalakkersuisuusimasunut akissarsiaritinneqassapput.
Inatsisit malillugit ukiup atuuffiup aallartinneri tamaasa qaammatip aappaa qeqqanut naatsorsuullugit ilaasortaajunnaarnersiat tunniunneqartassapput. Taamaattorli sivikinnerpaamik qaammatini pingasuni, sivisunerpaamillu qaammatini aqqaneq-marlunni aalajangersarneqarnikuupput. Aammattaaq naalakkersuisuniit ilaasortaajunnaarnersiat Inatsisartuniillu akissarsiat ataatsikkut tiguneqaqqusaanngillat.
