Macron: Ny Kaledoniami piaarnerpaamik eqqissisimanerulertoqarnissaa qulakkeerneqassaaq

Frankrigip præsidentia Emmanuel Macron Ny Kaledoniami eqqissiviilliornerit unitsinniaraluassallugit qeqertat taakku illoqarfiisa pingaarnersaannut Noumeamut maanna angalavoq.

Ny Kaledoniami innuttaasut franskisut innuttaassusillit Ny Kaledoniami nunap immikkoortuini qinersisoqarnerani qinersisinnaatitaalernissaat Frankrigip pilersaarutigileraalu Ny Kaledoniami nunap inoqqaavini inuit tuusintilikkuutaat eqqissiviilliortitsilerput.

Ny Kaledoniami nunap inoqqaavisa oqartussaaqataanerannik kimikinnerulersitsisinnaasoq nunap inoqqaavi oqarput.

Ny Kaledoniami ukiuni qulikkuutaani arlalinni aatsaat taama sakkortutigisumik eqqissiviilliortoqarpoq.

Biilit, pisiniarfiit atuarfiillu nunguillutik ikuallannikut takuneqarsinnaapput.

Ny Kaledoniami piaarnerpaamik eqqissineqarnissaa, isumannaatsuulernissaalu Emmanuel Macronip neriuutigaa.

- Innuttaasut tapersersorumavakka, piaarnerpaamik eqqissisimanerulertoqarlunilu isumannaatsuunissaa qulakkeerneqarniassammat, Macron, Ny Kaledoniap illoqarfiisa pingaarnersaata Noumeap timmisartoqarfissuanut tikikkamik oqarpoq.

Sakkutuut, politiit assigisaallu katillugit 3000-t Ny Kaledoniami qeqertani assigiinngitsuni upalungaarsimatinneqarput, eqqissiviilliornerit akerliussutsimillu takutitsinerit pinngitsoortinniarneqarlutik, pisariaqassappallu sivisuumik taamaattoqassalluni, taanna oqarpoq.

Ny Kaledoniami aaqqigiinngissutit aaqqiivigineqarnissaat pillugu suleqatigiissitaliaq Macronip tikeraarnermini ilaatigut pilersinniarpaa.