Lissi Ottosen EM-imi marlunnik kuultinnattoq
Lissi Ottosen Shotokan karate-domi Europami pissartaavoq. Taannami Kretami EU-ertoqarnerani ajugaavoq.
Nuummi karatertartut ilitsersuisuisa pisortaat marlunnik kuultinnammat karatertartut nunarsuarmi ilisimaneqaleriataarput, Nuuk Shotokan karate-do tusagassiuutinut nalunaarummi allappoq.
Taassuma EM-imi pissartanngornera nammineq ajugaaneriinnanngilaa, tamannami nunatsinni angusami aamma pingaaruteqarpoq. Nunarput nunani tamalaani karatemik unammisoqarnerani ukiuni qulikkaani aatsaat taama takutitsilluartigisoq, tusagassiuutinut nalunaarummi allassimavoq.
Aappaagu VM-eqataanissamut pilersaartut
Lissi Ottosen danskit nunanut allanut unammisartut peqatigalugit peqataavoq, taamaakkaluartorli Nuummi klubbimit peqataalluni. Danskit nunanut allanut unammisartut peqatigineranni Danmark taamaalilluni EM-mi 40-nik ujaminnalluni peqataasuni ajugaasoqarnerpaavoq.
Kretami unamminerup iluatsilluarnerata kingorna siumut maanna pilersaaruteqartoqalerpoq. Lissi Ottosen aamma Nuuk Shotokan Karate-do nunarsuarmi 2026-mi pissartanngorniuuteqataanissamut maanna anguniagaqarlutik pilersaaruteqalerput, klubbi allappoq.
