Folketingimi nunanut allanut tunngasunut ataatsimiititaliaq pingasunngornermi ataatsimiimmat 'Kunngeqarfiup USA-mut attaveqarnera' oqaluuserisassani pingaarnerpaavoq.

Danskit nunanut allanut ministeriata Lars Løkke Rasmussenip ataatsimiinnermi nipangiusimasussaatitaasumi, naalagaaffeqatigiinneq pillugu paasissutissiisoqartoq, matup killingani ataatsimiinnerup kingorna oqarpoq.

Kalaallit Nunaata, Danmarkip USA-llu suleqatigiissitaat januaarimi – ukiup affaata matuma siorna – akerleriissut aaqqinniarlugu pilersinneqarpoq.

USA-p præsidentiata Donald Trumpip USA-p Kalaallit Nunaat tiguartariaqaraa arlaleriarluni oqaatigaa.

Lars Løkke Rasmussen, suleqatigiissitap qanoq inissisimaffia siunissamilu qanoq ingerlanissaa oqaluttuarisinnaaviuk?

Isumaqatigiippugut - tamannalu Washingtonimut januaarimi tikeraarnitsinni siunertaavoq - pissutsit aaqqiiviginiarlugit oqallinnerup kikkunit tamanit peqataaffigineqarunnaarsinnissaa, inersimasutullu matoqqasumi sukumiisumik oqaloqatigiissutiginissaa.  

- Oqaannarsinnaavunga ataatsimiinnerpassuit ingerlanneqarsimasut. Ataatsimiinnerit suli amerlanerit pissapput. Suli naammassinngilagut, pitsaasumilli ingerlavugut, nunanut allanut ministeri oqarpoq.

Præsident Trumpip nammineerluni suleqatigiissitap suliaanut piffissap ilaani akuliuttariaqarnissaa nangilluni oqaatigaa.

NATO akulerunerussasoq

Lars Løkke Rasmussenip oqarnera naapertorlugu, nunat taakkua pingasut akornanni pissutsit ukiup nikinneraniit aamma pitsaanerulerput.

- Matut matoqqasut tunuanni siunissami isumaqatigiissuteqarnissarput pitsaasumik oqaloqatigiinssutiginiarsarivarput aammattaaq USA-p isumannaallisaanikkut soqutigisaat naapertuuttumik isumagineqarsinnaanissaat qulakkeerniarsaralutigu, kunngeqarfiup killeqarfii ataqqinneqassammata, taanna oqarpoq.

Naalakkersuisut siulittaasuata Jens-Frederik Nielsenip (D) Kalaallit Nunaata nunamik USA-mut tunniussinaviannginnini siornatigut erseqqissarpaa.

Lars Løkke Rasmussenip NATOp peqataanerulersimanera nangilluni oqaatigaa. 

- Amerikamiut ukiup ataatsip missaata matuma siorna isumaqarput Kalaallit Nunaat Issittorlu illersorneqassappata, USA-p tamanna suliassarigaa.

- Aammattaaq Danmark USA-lu Issittumi ilungersunartunut kisimik isumaginnittuusussaannginnerat pitsaasuuvoq, NATOlli iluani tamakkua isumagineqassammata, nunanut allanut ministeri oqarpoq.