Ilisimatusarfik kunngikkormiunit pulaarneqartoq: - Misigisaq killitsisimanarluinnartoq
Sila nillerlunilu anorleraluartoq, Kunngi Frederik Pikialaarfimmi inini atuartitsiviusuni, nuannersumik tikilluaqquneqarfiani kialaarpoq.
Kunngi ulluni makkunani Nuummut tikeraarpoq, Ilisimatusarfillu pulaarpaa.
Uumassusilerinermik ilinniarfimmi nutaami SILA-mi ilinniartut, imminnut ilinniagartillu pillugit Kunngi oqaluttuunnissaanut periarfissinneqarput, Kunngilu aqissip puiaaneersunik mamarsaasikkamik snapsissaanik tunivaat – misilerngaagassaanik.
Aviâja Lyberth Hauptmann SILA-mi immikkoortortaqarfimmi pisortaq, pulaartoqarnerminnut tanngassimaartupilussuuvoq:
- Kunngip ilinniartuutittalu imminnut avitseqatigiinneri, Kunngimut, naalakkersuisut siulittaasuanut ilinniartitaanermullu naalakkersuisumut, ilinniartuutitta qanoq pikkorilluinnartigineri takutinnissaannut periarfissaqarsinnaagatta misigisaq nuannerluinnartuuvoq. Misigisaq killitsisimanarluinnarpoq, taanna oqarpoq.
Immikkuullarisoq
Pulaarnermuttaaq ilinniakkamut nutaamut, inuit kulturiannik naggueqartuusumut nersorinninneruvoq.
- Ilinniartut immikkuullarilluinnartumik – immikkuullarilluinnarlutik - aallartitsisimasutut migisimassasut neriuutigilluinnarpara. Asseqanngilluinnartumimmi pilersitsivugut, ilinniartullu tamanna peqataaffigaat. Tamassuma Kunngip naapinneratigut uppernarsarneqarpoq, Aviâja Lyberth Hauptmann oqarpoq.
Illinniagaq februaarimi ukioq manna aallartippoq, aallartilluarnerusinnaanngilaq aamma, immikkoortortaqarfimmi pisortaq isumaqarpoq.
- Uummatitta ilorpiaaniit suliniut pilersipparput, taamaammat ingerlalluarfimmiippugut, malugineqarsinnaagaangallu nuannaarnerup pianik qullililaanngitsoorfiunngilaq, Aviâja Lyberth Hauptmann oqarpoq.
Ilinniagaq asseqanngitsoq
Ilinniartuttaaq nuannaarnerat takuneqarluarsinnaavoq. Ilinniartitsineq ullup qiterarnerata nalaani aatsaat aallartittussaagaluartoq, Kunngi Frederik ilassiniarlugu ilinniartut tamangajammik ullaarnganiit takkupput.
Ilinniartut ilaata, 23-nik ukiullip Bilo Chemnitzip SILA pillugu Kunngi oqaluttuuppaa, aqissillu puiaaneersunik mamarsaasikkamik snapsiliamik misiliiterngaarlugu.
- Nuanneqaaq, Bilo Chemnitz Nuummeersoq oqarpoq, illaatigalunilu nangilluni:
- Assammippara, aqissillu puiaaneersunik mamarsaasikkamik snapsimik tunillugu. Misilinnikuunngisaannarpaa. Taamaammat siullersaallunga taassuminnga misiliitippara.
Pinnaluk Brask Olsen, 27-nik ukiullip Sisimiuneersup aamma pulaartoqarnertik nuannaarutigaa.
- Pulaartoqarluni nuanneqaaq. Paasisinnaavara pulaarnissarput soqutiginartikkaa. Ilinniagaq nunatsinnut tulluarsagaammat asseqarnanilu immikkuullarissuuvoq, taanna oqarpoq.
Ilinniagaq nuannerluinnaqqissaartoq
Pulaartoqarnermi nuannaarneq kunngikkormiunik pulaarteqarnermuinnaq tunngaveqanngitsoq malunnarpoq – ilinniakkamummi aamma tunngaveqarluinnarpoq.
- Ilinniagaq nuannerluinnaqqissaartuuvoq, Bilo Chemnitz oqarpoq.
Ilinniartitsinermi pingaarutilinnik soqutiginartunillu naleqquttunik sammisaqartarnertik nuannareqaa. Pingaartumik aqissit pillugit ilinniartitaanertik nuannaraa, nammineerlunimi piniarneq nuannarisaraa. Taassuma saniatigut ukiarnissaanut qilanaarpoq, tuttunniartussaagamik.
- Nammineerlunga aqissinik 660-nik pisaqarnikuuvunga, taassuma ilanngullugu oqaatigaa.
Pinnaluk Brask Olsenip aamma ilinniagaq nuannareqaa, ilinniartitaanermilu nunatsinni pinngortitaq kulturittalu sammineqarluarnerat qujamasuutigalugu:
- Qaammatit pingasut kingulliit nuanneqaat, misigisarpassuaqarpugut ilaatigut nunanit allaniit assigiinngitsuniit, inuit kulturiinit allaneersunittaaq ilinniartitsisoqarpugut, taanna oqarpoq.
