Korea Kujalliup præsidentia sukannersumik naalakkersuisoqarnissaata atorunnaarsinnissaanik nalunaaruteqartoq
Korea Kujallermi akunnialunni nalornisoqarlunilu politikkikkut eqqissiviilliortoqareersorlu, Korea Kujallermi sukannersumik naalakkersuisoqarnissaata atorunnaarnissaa Korea Kujalliup præsidentiata nalunaarutigaa.
Sakkutuut sukannersumik naalakkersuisoqarnissaanik qulakkeerinnittut maanna tunuartereersut, taassuma ilanngullugu oqaatigaa.
Nunami tassani marlunngornermi unnukkut eqqissiviilliortoqareersorlu taama nalunaaruteqartoqarpoq.
Korea Kujallermi sukannersumik naalakkersuisoqarnissaanik præsidentip nalunaaruteqarnera illuatungiliuttunit præsidentillu nammineq partiianit isornartorsiorneqarpoq.
Nunap tunngaviusumik inatsisaanik unioqqutitsisutut tamallu oqartussaaqataaneranik suusupaginnittutut pasineqarpoq.
Korea Kujallermi politikerit inatsisartuni taamaattoq unnuap ingerlanerani ataatsimiissinnaasimapput. Sukannersumik naalakkersuisoqarnissaa inatsisartut taasinikkut atorunnaarsippaat. Inatsisartut 190-it tamarmiullutik akuersipput.
Præsidentip Yoon Suk-yeolip sukannersumik naalakkersuisoqarnissaanut suut tunngavigalugit aalajangerneraa suli nalornissutigineqarpoq. Præsidentip taama tassanngaannartigisumik aalajangernera, immikkut ilisimasallit iligisallu tupigusuutigaat.
Korea Kujalleq Korea Avannarlermi kommunistit sakkutuuinut illersorsinnaaniassammat sukannersumik naalakkersuisoqarnissaa aalajangerlugu, Yoon Suk-yeolip nammineq oqaatigaa.
Yoon Suk-yeolili Korea Kujallermi politikkikkut tapersersorteqarpianngitsoq paasinarsivoq, assersuutigalugu aappaagumut aningaasanut inatsisissatut siunnersuut inatsisartuni akuersissutigitissinnaanagu.
