Kalaallisut aallakaatitassiat amerlanerulernissaat, tusagassiuutitigut sammisat soqutiginartuunissaat aamma qarasaasiatigut attaveqaatit nutarterneqarnissaat, KNR-ip periusissiaani nutaami anguniakkat ilagaat.

Periusissiami saqqummiunneqaqqammersumi tusagassiuutip innuttaasunik kiffartuussisup inuiaqatigiinnut akisussaaffia erseqqissarneqarpoq, tassanilu nunami ataatsimoornerup nukittorsarnissaa, oqartussaaqataanerup nukittorsarnissaa aamma nutaarsiassanik attuumassuteqanngitsumik tutsuiginartumillu siammarterinerup qulakkeerneqarnissaa tunngavigineqarpoq. KNR tusagassiuutinut taama nalunaaruteqarpoq.

Periusissiaq nunatta avataanit isiginiarneqarnerani saqqummiunneqarpoq. Taamaattumik KNR aatsaat taamak pingaaruteqartigisumi inissisimasoq, pisortaq Hans Peter Poulsen tusagassiuutinut nalunaarummi oqarpoq.

- KNR aatsaat taamak pingaaruteqartigaluni inissisimavoq. Nunarput avatitsinnit tatisimaneqartillugu periusissiaq aqqutigalugu atuisutsinnut aammalu sulisutsinnut akisussaaffeqarnerput ersarissarpavut. Oqaluttuat Nunatsinneersut nammineerluta oqaluttuarissavagut, taamaaliornitsinnilu piffissami nunanit tamalaanit isiginiarneqarnitsinni avaqqukkuminaalluta tutsuiginassuseqassaagut, taanna oqarpoq.

Tamanna ilutigalugu kalaallisut nutaarsiassiisarnerup qitiutinneqarnissaa pingaaruteqarpoq. Kalaallisummi nutaarsiassiisarneq KNR-ip ilisarnaataasa ilagaat, siulersuisuni siulittaasup, Nukaaraq Eugeniusip, maluginiaqquaa. 

- KNR-ip ilisarnaataasa pingaarnersaraat kalaallisut tusagassiortarnerput. Nunarsuatsinni naggueqatigiit Inuit oqaasii atorlugit ataavartumik tusagassiisartut annersaraatigut. Taamaattumillu oqaatsivut atorlugit kiffartuussinerput inerisartuarlugulu pitsanngorsagassatta annersaraat, Nukaaraq Eugenius tusagassiuutinut nalunaarummi oqarpoq.

Suut tamarmik imaaliallaannaq iluarsinavianngitsut

Periusissaq nutaaq ukiuni sisamani 2026-miit 2030-mut atuutissaaq.

Periusissiaq attaveqaqatigiinnermut pilersaarummik tapertaqassaaq tassanilu suliniutit KNR-ip kinaassusaanik nukittorsaasut ammasumik pissapput.

- Suliffeqarfitsinni suut tamarmik tassanngaannaq iluarsinavianngillat. KNR-imili sulisuvut allannguinissamut piumassuseqarluarput. Ukiup matuma aallartinnerani kingumut tatisimaneqarnerujussuatta nalaani ilungersorlutik pitsammik sulinerat pisortaalluni assut tulluusimaarnarpoq, Hans Peter Poulsen tusagassiuutinut nalunaarummi nangilluni oqarpoq.

KNR-i sulisoqarnikkut pingaartumik nutaarsiassaqartitsivimmi ajornartorsiornermik ukiuni kingullerni eqqugaaqqavoq, sulisut taarseraatingaatsiarlutillu uippakajaarnertik pissutigalugu suliunnaarallartariaqartut arlaliupput.

Tusagassiortut kalaallit kajungilersinniarnerat aamma ajornakusoorpoq. Tassani pingaartumik akissarsiat suliffimmilu pissutsit pineqarput.

Tamanna nuna tamakkerlugu tusagassiorfiup nutaasiassiinikinnerulerneranik kinguneqarpoq. Qallunaatut radioaviisi unitsikkallarneqarnissaa KNR-ip 2025-p aallartinnerani aalajangiuppaa. Taannalu suli aallartinneqaqqinngilaq.

KNR-imi pissutsit pitsanngorsaavigineqarnissaat pillugu, Inatsisartunut qinersisoqarnerani partiit siulittaasuisa isumaqatigiissutigaat. Aningaasanik amerlanerusunik tusagassiorfimmilu pissutsinik pitsaanerusunik qulakkeerinissaq aamma oqallisigineqarpoq.