Partiit akimorlugit: KNR aningaasassaqarnerullunilu atugassarititaasut pitsaanerussapput

- Inuiaqatigiinni nakkutilliisorput pingaarnerpaarpaaq tassa Kalaallit Nunaata Radioa TV-alu massakkut uppeqqavoq.

Siumumi maanna siulittaasuusimasup, Erik Jensenip KNR-ip qanoq innera partiit siuttuisa qinersinissamut aqaguinnanngortoq taama nassuiaatigaa.

Partiit demokratiimik qanoq illersuiniarnerannut apeqqummut tunngatillugu taanna taama oqarpoq.

Erik Jensenillu KNR-ip ajornartooqqangaatsiarnera oqaatigipallappaa.

Taassuma demokratiimik illersuisut pingaarpaatut isigisani ikiorasuarnissaannut partiit qinersinerup kingorna ataatsimoorlutik ikiuinissaat kissaatigaa.

- Qinersinerup kingorna isumaqarpunga nikeqatigiittariaqartugut partiit tamatta, nakkutilliisugut pingaarnerpaarpaat, tassalu KNR-ikkut nukittorsartariaqarpagut, makiteqqittariaqarpagut. Taamaaliunngikkutta fake news, social mediat ullutsinni manipuleeriisinnaaneq annertoorujussuaq ingerlasoq taanna unammillersinnaajunnaassagatsigu, Erik Jensen oqarpoq.

Taassumalu nunatsinni tusagassiornermi sinaakkutinik pitsaanerusunik qulakkeerinissaq pissutigalugu Inatsisartuni partiit 'qinersinerup kingorna piaartumik' tusagassiorneq pillugu isumaqatigiissuteqarnissaat kaammattuutigaa.

Naak naalakkersuisut KNR-illu KNR-ip innuttaasunik kiffartuussisussaatitaaneranut isumaqatigiissut nutaaq 2024-mi januaarimi isumaqatigiissutigisimagaluaraat.

Taama nalunaaruteqarneq KNR-ip pingaartumik Nutaarsiassaqartitsiviup ukiuni kingullerni eqqissiviilliorfiunerata kinguneratigut pivoq.

Ukioq mannaannaq pisortaq siulersuisunit soraarsinneqarpoq, tusagassiortullu arlallit soraarlutik. Sapaatip akunnerata siuliani pisuni sakkortunerpaaffissamiippoq, tassami nutaarsiassaqartitsivimmi sulisut 16-it suliffimmi atukkat pissutigalugu sulinerminnik unitsitsiniarlutik nalunaaruteqarput.

Sulinermik unitsitsineq isumaqatigiissummik unioqqutitsineruvoq, tamannalu KNR-ip aqutsisuinit akerlilerneqarluni sulisinnaajunnaarsitsinissamik erngertumillu soraarsitsinissamik siorasaaruteqarfiuvoq.

Sulinermik unitsitsinerup kingorna tallimanngornermi Nutaarsiassaqartitsivimmi sulisut sisamat soraarsinneqarput sinnerilu aqqaneq-marluk allakkatigut mianersoqqussummik tunineqarlutik.

IA: Illorsuit nutaat

KNR aningaasaliiffigineqarnerussasoq minnerunngitsumillu pitsaanerusunik sinaakkuteqassasoq, IA-p siulittaasua, Múte B. Egede isumaqarpoq, taassuma tamanna partiit siuttuisa ataasinngornermi oqallinneranni oqaatigaa.

- Illorsuit assersuutigiinnavillugit, massakkut lageritut ittunik KNR angerlarsimaffeqarallartinneqarpoq. Taanna oqaatigisariaqarpoq. Pitsaanerusumik illorsuaqartariaqarpoq, nutaarsiassaliornikkut suliaqarsinnaaneq pitsaasoq pigineqartariaqarpoq, taanna oqarpoq.

Nuummi tusagassiorfimmik nutaamik illorsualiornissamut siunnersuut ukiuni arlalinni politikerit oqaluuserisassaanniippoq. Aningaasanulli inatsimmi sanaartornissamut aningaasassat peerneqartarput.

Múte B. Egedeli ataasinngornermi unnukkut allatut oqariartuuteqarpoq.

- Ullumikkut ilaatigut eqqartorneqartarpoq aningaasaliivallaartoqartoq. Isumaqarpunga tamat oqartussaaqataanerat aningaasalerlugu siunissalertariaqartoq, taanna oqarpoq.

Atassutip siulittaasuata, Aqqalu C. Jerimiassenip KNR-imi sulisunut – tusagassiortunut, teknikerinut sulisunullu allanut isumaqatigiissutinut aamma tunngassuteqarnerarpaa.

Ullumikkutut itsillugu akissarsiat eqqarsaatigigaanni Namminersorlutik Oqartussani, kommunini imaluunniit suliffeqarfinni namminersortuni sulinissaq KNR-imi tusagassiortuunissamit pilerinarnerungaatsiarpoq.

- Tusagassiortutut ilinniagaqarnikuusut allamik suliffeqaraangamik akissarsiarissaarnerusartut ilaatigut tusartarparput, taamaattumillu tamaani sulinissartik ilaatigut apeqqusernartittarlugu, Aqqalu Jerimiassen oqallinnerup nalaani oqarpoq.

Partiit KNR-imi sulisut peqatigiiffiinit kissaatigineqartunut tusarnaartoqarnissaa Jerimiassenip kaammattuutigaa.

Aamma Demokraatit siulittaasuata, Jens-Frederik Nielsenip qinersinermi qinigaanerpaasup maanna naalakkersuisoqatigiinnik pilersitsiniartussap innuttaasunut kiffartuussinermik ingerlatsivimmut aningaasaliisoqarnerunissaa aamma piareersimaffigaa. Taassumali KNR-imi sulisut qanoq attanniarneqarnerisa misissorneqarnissaa aamma kissaatigaa.

- Tamakkiisumik isiginnilluta suliffeqarfimmi qanoruna attassiinnarnissamut periusissiat suliarisinnaagivut soorlu orniginarnerussammat maani illumi tusagassiortuuneq? Taanna tv-kkut oqallinnermi oqarpoq.

Nuup avataanit aallakaatitassaqarnerunissaa kissaatigineqartoq

Minnerunngitsumillu KNR-ip Nuup avataani tusagassiortoqarnerunissaa aamma pitsanngorsarneqarusuppoq.

Aningaasassaqartoqannginnera pissutigalugu KNR-ip aallakaatitaasa amerlanerpaartaat Nuummi Nuulluunniit eqqaani ullumikkut suliarineqartarput.

- Iluarisimaarpara taanna naaperiarneqarnera, tassa sineriammiit maannga apuussisarneq paasissutissanik killormuinnaanngitsoq (…) Aningaasartalernissaanut uagut piareersimavugut, Naleqqap siulittaasua, Pele Broberg oqarpoq.

Taanna IA-mit taperserneqarpoq, Siumumiillu Erik Jensen aamma tassunga akissuteqaqqippoq:

- Innuttaasut tassa maannakkut maqaasivaat nunap immikkoortuini illoqarfinni nunaqarfinnilu tusagassiorfiit aallakaatitassiaat, massakkut aningaasat killeqarnerat peqqutigalugu Nuummi pisut annertoorujussuarmik taakku tusagassiarineqartarput, kisianni qanga tusagassiorfiit sinerissamiittut amerlasoorujussuunikuupput, Erik Jensen oqarpoq.