Kattuffiup qullersat akissarsiaasa qaffasippallaarneri naammagittaalliutigai
Royal Greenlandip pisortai tallimat aningaasanik katillugit 25 millionit koruningajalluinnarnik 2024-imi akissarsiaqartut, aalisakkerivimmi sulisut ilinniarsimanngitsut nalunaaquttap akunneranut 122 koruunisisarput.
Taamak Royal Greenlandip ukiumut naatsorsuutit inernerini 2024-meersumi saqqummiunneqaqqammersumi allaqqavoq. Namminersorlutik Oqartussat ingerlatseqatigiiffianni pisortat tallimat, katillugit 24,9 millionit koruuneqqissaanik siorna akissarsiaqarput.
Suliffeqarfissuarmi tassani aalisakkerivinni sulisut, ilinniarsimanngitsut, akunnermut tunngaviusumik 122,47 koruuninik akissarsiaqarput. SIK-mi siulittaasumut kissaammertitserujussuartumik.
- Naleqqutinngillat. Naammagittaalliortoqarnera tupinnanngilluinnarpoq, Jess G. Berthelsen KNR-mut oqarpoq.
Sulisut salliullugit
Jess B. Berthelsen naapertorlugu suliffeqarfissuaq Namminersorlutik Oqartussanit pigineqartoq aalisakkerivinni sulisuminut aningaasanik tukkornerusariaqarpoq.
- Qangali isumaqartuarpunga aalisakkerivinni sulisut aningaasarsiaat appasippallaartut, taanna oqarpoq.
SIK-p aalisakkerivinni sulisut sulinerminni atugaasa qanoq innissaat Royal Greenlandimut isumaqatigiinniutigisarpai. Tassa SIK Royal Greenlandimi atorfilinnut isumaqatigiinniartarput. Suliffeqarfissuulli siulersuisui aningaasanik sinaakkusiisarmata taakkua aamma aningaasivimminnit aalisakkerivinni sulisunut pilliuteqarnerusariaqarsorai.
- Ulluinnarni akisussaasut, siulersuisut, akuersisariaqarput annertunerusumik qaffaaffigineqassasut, ulluinnarni napatitsisut, tassa aalisakkerivinni sulisut, taanna oqarpoq.
Jess G. Berthelsenilli SIK-p ilaasortai qanoq aningaasarsiaqartariaqaraluarnersut pillugu apeqqut akiumanngilaa.
- Ukioq manna isumaqatigiinniartussaavugut aamma Royal Greenlandimut, taamaattumik maannakkut kisitsisinik saqqummiussuinianngilanga, Jess G. Berthelsen oqarpoq.
