Aslak Wilhem Jensen nipisaat suaannik akitsorterunneqartussanik nassiussisoq

Nuummi aalisartoq Aslak Wilhem Jensen nipisaat suaannik akitsorterunneqartussanik timmisartukkut Danmarkimut nassiusseqqammerpoq.

Nutaarluinnarnik timmisartukkut nassiussinnginnermi qanoq isumassarsisimanini ima Aslakip oqaluttuaraa:

-Uanga inuusuttuarannguullungali taanna suannialeqqaaramali isumaq niaqunniittuarnikuuvoq. Ingerlanniarnera imaannaasimanngilaq, suna piumasaqaatit pigisariaqarnerikka tamaaviisa piareersarfigileriataarnikuuakka.

-Nutaamik eqqarsassagaanni qunusuilluni aamma alloriarsinnaaneq piusariaqarpoq.

Aslakip taama nutaggarinnik asiunaveersaaserneqangitsunilluunniit avammut niuernissamik eqqarsaateqartut ima kaammattorpai:

-Inuusuttut kajumissaarusuppakka taamatut qinnuteqassasut avammut niuersinnaanermik akuersissummik, taavalu sillimaffigissavaat pikkorissarsimasuusariaqarpoq, inuussutissalerinermut eqqiluisaarnermullu kursusersimasariaqarpoq. Taakkulu ilaatigut kattuffiit suleqatiginerisigut, peqatigiiffiit soorlu Camp-Kujalleq, Naalakkersuisoqarfik saaffiginerasigut imaluunniit najukkami kommune aqqutigalugu. Taanna pigisariaqarpoq.

Nuummi aalisartoq Aslak Wilhem Jensen nipisaat suaannik Danmarkimut akitsorterussisoq ilaatigut taama oqaluttuarpoq.

Akitsorterivimmi Hansholm Fiskeauktionimi pisortaq aamma piginnittoq Jesper Kongsted nipisaat suaannik kaattaassineq iluatsilluarnerarpaa:

-Tikiunneqartut kusanarluinnarput, tamanna nuannaarutigingaarparput, minnerunngitsumik siunissaq eqqarsaatigalugu nipisaat suai pillugit neriunartoqarluarpoq, Jesper Kongsted oqarpoq.

Taassuma oqarnera naapertorlugu, ukiup aallartilaarnerani akitsorterussisoqarsimasuuppat, angusat qaffasinnerujussuussagaluarput.

-Taama akitsorterussineq januar, februar imaluunniit martsimi ingerlanneqarsimasuuppat akit qaffasinnerujussuit anguneqarsimassagaluarput, ukiummi aallartilaarnerani nipisaat suai Danmarkimi piumaneqarnerusaramik.

Kaattaassivimmi Hansholm Fiskeauktionimi pisortaq aamma piginnittoq Jesper Kongsted taama oqarpoq.