Kate kræfteqalernermi kingorna pisortatigoortumik siullerpaamik tamanut saqqummertoq
Tuluit kunngiat Charles Pingajuat ullumi inuuissiorpoq, kunngi Charlesillu ukuaa prinsesse Kate Charlesip inuuissiorneranut atatillugu paradeqarnermi peqataassaaq.
Prinsesse Kate, uinilu Prins Williamilu meeqqani peqatigalugit karetimut ilaasut assit BBC-meersut Sky Newsimeersullu takutippaat.
Prinsesse Katep kræfteqalersimanini tamanut ukioq manna marsimi saqqummiuppaa.
Londonimi ullumi paradeqarnera Trooping The Colour Parademik taaguuteqarpoq, kræfteqalernermilu kingorna prinsesse Kate tamanut siullerpaamik saqqummerpoq.
Parademut peqataanissani nalunaarutigigaa
Londonimi paradeqarnissaanut peqataaniarnini prinsessep ippassaq nalunaarutigaa.
Prinsesse Katep kræftiata suussusaa tamanut saqqummiunneqarnikuunngilaq, katsorsarneqarneratalu siumut ingerlanera nalunaarutigineqarpoq, tamanullu pisortatigoortumik saqqummersinnaanngortoq prinsessep inoqatinut attaveqaqatigiittarfikkut Instagramikkut tallimanngornermi allaaseraa.
- Siumut ingerlavunga, kemoterapeertutulli alllatut ulloqartarpunga pitsanngornerullunga pitsaavallaarnangalu, prinsesse Kate allappoq.
Kunngikkormiusulli pisussaaffimminut suli utersinnaannginnini ilanngullugu nalunaarutigaa.