Kalaallit Illuini pisortat: Inuusuttuaqqat ilinniartut danskit oqaasiinut pikkorlupput

Danmarkimi Kalaallit Illuini ilinniartunut siunnersortit inuusuttuaqqanik oqaloqateqartarnerminni, taakku danskisut oqalunnermik pikkorluppallaarneri ukiuni kingullerni ajornartorsiutaalersimasoq paasivaat.
 
Tamanna tunngavigalugu Danmarkimi Kalaallit Illuini pisortat sisamat, Leise Johnsen, Kirsten Mærsk, Jørn Holbeck aamma Søren Stach, Nunatsinni Ilinniartitaanermut Naalakkersuisumut Nivi Olsenimut ammasumik allagaqarnerminni oqaatigaat, ilaatigut oqaatsitigut ilinniaqqissinnaanermut periarfissat, massakkut inatsisiusunit akimmisaartinneqartut.

- Oqaatsitigut ilinniaqqissinnaanerit Danmarkimi periarfissaapput, taakkulu atorluarnerusariaqarput ilinniartut ilinniakkaminnik pitsaanerusumik angusaqartalissappata, Kalaallit Illuini sisamaasuni pisortat ilaatigut taama allapput imalu nangillutik.
 
- Nunatsinni ilinniartitaanermut inatsit massakkutut iluseqartillugu, inuusuttuaqqat danskit oqaasiinut pikkorinnerulerusuttut Namminersorlutik Oqartussanit tapiiffigineqarsinnaanngillat, pisortat allapput.
 
Taakku ilanngullugu aamma allapput, inuusuttuaqqat Danmarkimut aallartinnatik imaluunniit Danmarkimut tikitsiaannarlutik, danskisut oqalunnermik ilinniartinneqartalersuuppata, ilinniartut katataasartut siunissami ikinnerulissagaluartut.

Aamma atuaruk Oqaatsitigut ilinniartitaaneq pillugu oqallinneq naalakkersuisup nuannaarutigaa

Aamma atuaruk Meeqqat atuarfiat isumakuluutigaa

Danmarkimi ilinniartunut tamanut piumasaqaatit qaffakkiartornerisa pilersitaanik, kalaallit ilinniartut siunissami katataasut suli amerleriarnissaat, Kalaallit Illuini pisortat annilaanngatigalugu, Ilinniartitaanermut Naalakkersuisunut ammasumik allakkaminni naggasiutigaat.

Ilinniartitaanermut Naalakkersuisup, Nivi Olsenip Kalaallit Illuini ilinniartunut siunnersortit ullaatungaa ataatsimeeqatigai paasiniarlugu sunarpiaq ajornartorsiutaanersoq.