Kalaallinut ilinniartunut ineqarfiit nutaat

Kalaallit ilinniartut Københavnimi ilinniartunut ineqarfinnik ajornannginnersumik pissarsisinnaanngorput. Tamanna Københavnimi Kalaallit Illutaata aamma Fonden DIS-ip akornanni suleqatigiinnissamut isumaqatigiissutip nutaap qulakkeerpaa.

Allattoq Rasmus Balle Hansen

maajip 30-at 2025 16:46

Danskit illoqarfiisa pingaarnersaanni, Københavnimi inissarsiniarneq ajornakusoorluinnarsinnaavoq.

Ilinniartulli Sølvgade Kollegiumimi ineqarfiit aqqaneq-marluk kalaallinut Danmarkimut ilinniariartortunut ukiumi siullermi ilinniartunut neqeroorutigineqartalissapput. Københavnimi Kalaallit Illuutaata tusagassiuutinut nalunaarutaani tamanna allassimavoq.

Aamma atuaruk Aalborg Københavnilu: Kalaallit ilinniartut inissaat 35-t piariilersut

- Kalaallit inuusuttut ilinniariarneranni ukiumi siullermi toqqissisimanartumik qiterpasissumiittumillu inissaannik neqeroorfigisinnaalernerat nuannaarutigingaarparput. Kalaallit ilinniartut tikilluaqqusaasutut misiginissaat Danmarkimilu ilinniarnerminnik aallartitsilluarnissaat uagutsinnut pingaaruteqarpoq, Kalaallit Illuutaanni pisortaq, Leise Johnsen tusagassiuutinut nalunaarummi allappoq.

Suliniutip nutaap ineqarniarnermi ilungersunareersumi inissaqarnissaq kisiat qulakkiissanngilaa. Tamannali kalaallit aamma nunanit tamalaanit ilinniartut atassuteqarlualernissaannik ataatsimoornissaannillu pilersitsissasoq, tusagassiuutinut nalunaarummi allassimavoq.

Kalaallit nunaniillu allanit ilinniartut akornanni atassuteqalerneq

Sølvgade Kollegiet ulluinnarni nunanit tamalaanit ilinniartunut DIS-imeersunut ineqarfiusoq isumaqatigiissut malillugu nunatsinneersunut inuusuttunut aamma kateriffiulissaaq. DIS Københavnimi ilinniarfiuvoq pingaartumillu nunanit allanit ilinniartunut sammisuulluni.

Aningaasaateqarfimmi DIS-imi, Academic Directorip Helle Rytkønenip oqarnera naapertorlugu suleqatigiinnermut nutaamut naatsorsuutit annertupput:

- Kalaallit ilinniartut ineqarfitsinnut tikilluaqqusinnaalernissaat qilanaaraarput. DIS-ip Kalaallit Nunaatalu akornanni pitsaanerusumik atassuteqalernissamut anguniagaqarnitsinni pingaarutilimmik alloriarneruvoq, tusagassiuutinut nalunaarummi allassimavoq.

Aningaasaateqarfik DIS pillugu

Ateq: Fonden DIS ullumikkut DIS – Study Abroad in Scandinaviatut, ilisimaneqarpoq, kattuffilli Danmarkimi InternationaleStudenterkomitémit aallaaveqarpoq.
Siunertaq: Danmarkimi inuusuttut ilinniartut inuunermi atugaannik siuarsaasinnaasunik aallarnisaanissamik, paasisaqarnissamik aamma/imaluunniit suliniutinik tapersersuinissamik siunertaqarpoq; tassa suliaqarfiit naleqquttut aamma kattuffiit suleqatigiinneratigut siunertamik matumani angusaqarnissaq.
Suliat: Københavnimi aamma Stockholmimi pingaartumik Amerikap avannaamiuinut ilinniarnerup ilaani imaluunniit aasaanerani atuartitsinerni ilinniartunut neqerooruteqarneq. Ilinniartitsineq tuluttut ingerlanneqarnerusarpoq, ilinniagartuunullu atuartitsinerit ilinniarnermi angalanernut kulturikkullu paasiniaanerit kattunneqartarlutik
Pingaartumik sammisat: Kulturikkut paasisimasanik siuarsaaneq aamma ilinniagartuutut ilinniarnermi qanimut attaveqarnermi ineriartorneq kiisalu Skandinaviami kulturimut qanimut atassuteqarneq

Paasissutissarsiffik: www.dis.dk og disfonden.dk

Allisiguk

Ilinniartut ukioq siulleq ilinniarnerup kingorna Sølvgade Kollegiemiinnermi sivitsorneqarnissaanut imaluunniit DIS-ip kollegieqarfianut allamut qinnuteqarnissamut periarfissaqassapput.

Aamma atuarukKøbenhavnimi ilinniartortavut immaqa kollegiassarsissunneqangajalertut

Isumaqatigiissut kalaallit Danmarkimi ilinniartut pitsaanerusumik atugaqalernissaanut pisariaqartumik tapertaasussatut isigineqarlunilu nunatsinnit aamma nunanit tamalaanit ilinniarnermi avatangiisit akornanni kulturikkut atassuteqarnermi pitsaanerulersitsissaaq.

Kalaallinut ilinniartunut ilinniartut ineqarfii Folketingimi Inuit Ataqatigiit aamma Siumup aningaasaliissuteqarneratigut aningaasalerneqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.