Politikki

Kaammattuut: Qallunaaluarneq unitsilli!

Naaja Nathanielsen (IA) isumaqarpoq oqaatsit aporfiusarneri amerlasuut sammivallaaraat, taamaalillutik qallunaaluartutut ulluinnarni isigineqalersarlutik.

Allattoq Niels Krogh Søndergaard

apriilip 19-at 2013 14:15

Aqqusinermi suaartarfigitinnerit, kaffisoriartorfinni tusangiasaarneqarnerit, facebook-imi aamma suliffimmi. Illuatungiliuttunngorlaap IA-meersup Naaja Nathanielsen-ip sapaatip akunneri tamaasa qallunaanut kalaallinullu qallunaatuinnaq oqaluttunut qallunaaluarnerup sakkortusisimanerujussua assersuutissaqartippaa.

- Nalinginnaaleriartuinnarpoq inuit ima oqaluttarnerat, kalaalivik Nuummi najugaqanngilaq, qallunaatullu oqalunnani. Tamanna uuttuutaassappat, taava amerlaqaagut nunami maani kukkusuusut, Inuit Ataqatigiit sinnerlugit Inatsisartuni ilaasortaq Naaja Nathanielsen oqarpoq.

Taassuma aarleqqutigaa kalaallit qallunaatuinnangajak oqaluttut kalaallillu kalaallisuunerusoq oqaluttut akornanni immikkooraluttuinnarnissaq. Akuttunngitsumik pisoqartuaannarpoq sumi tamaani tusaqqusaartunik. Qallunaat Nunaannut attuumassutilinnik kikkunnilluunniit ammip qalipaataanik immikkoortitsinertut taaneqarsinnaasunik.

- Assersuutigalugu inuit qarasaasiaminni allagarsisut allannilinnik "rejs hjem din dumme dansker" "qallunaapalaaq angerlarniarit". Allagarsiat taamaattut assorsuaq narrunarsagaasutut misiginarput, pineqartoq qallunaajuguni qallunaajunngikkuniluunniit - taama pineqartoq tusarfigisara kingulleq kalaaliugaluarpoq, Naaja Nathanielsen oqarpoq.

Politikerip annilaangatigaa kalaallit inuiaqatigiit akornanni avissaartuuttoqalersinnaanera, inuit akornanni nalinnginnaalissappat inuiaat marlunngorlugit avinneqassappata eqqortutut eqqunngittutullu.

- Inunnik allanik taamatut pinninneq eqqortuusinnaanngilaq. Taava pakatsineq qiviartariaqarparput, iliuutsinut peqqutaarpiartuungunartoq- assersuutigalugu, sooruna inuiaqatigiitsinni kalaallisuinnaq oqaasillit ilinniagaqartinnissaat taama ajornartitsigigipput - qallunaatuinnarli oqaasillit pisuutinneqassanngillat. Tamanna namminneq pisuussutiginngilaat, Naaja Nathanielsen oqarpoq.

Naaja Nathanielsenip aamma oqaatigaa, eqqaamasariaqartoq Nunatsinni oqaatsit eqqarsaatigalugit naleqqutinngitsorpassuaqartoq. Kaammattuutigerusuppaali ajornartorsiutit assigiinngitsorpassuit tunngavippiai isiginiaqqullugit, qallunaat Kalaallit Nunaanni sunniutigisimasarpassui ajornarorsiutitut inissinnagit.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.