Jyllandip kujataani qimuttuitsut ajutoornerisa kingorna inuk ataaseq toqusoq inuppassuillu ajoqusertut

Jyllandip kujataani qimuttuitsut ajutoornerisa kingorna inuk ataaseq toquvoq inuillu marluk qulimiguulimmik napparsimmaviliaanneqarput, arlalillu ajoqusersimallutik.

Tallimanngormat ualikkut qimuttuitsut Kliplevip Tinglevillu akornanni ajutoornerisa kingorna taama Syd- og Sønderjyllands Politi tallimanngormat unnukkut nalunaarput.

Nunalerinermut qamutillu aportut

Bjerndrupip kujataani qimuttuitsut nunalerisullu qamutai sukkasuumik ingerlaartillutik apormata ajutoorneq pisoq politiit ilisimatitsipput, taakkulu ajutoornermik nalunaaqutaq tallimanngoriartulersoq kalerrinneqarput.

Inuit 95-it missaat qimuttuitsuuniissimasut, DSB ilisimatitsivoq. Inuit qassit ajoqusersimanersut politiit ilisimatitsissutiginngilaat, TV 2-li naapertorlugu inuit ikinnerpaamik 24-t ajoqusersimapput.

Toqusoq qimuttuitsuunissimanersoq nunalerisulluunniit qamutaaniissimanersoq ilisimaneqanngilaq.

Toqusup ilaqutai nalunaarfigineqarsimasut, politiit ilisimatitsipput.

Qulimiguullit marluk ajoqusersimasunik sumiiffimmit aallarussipput, aallarunneqartullu qanoq innerinik politiit nalunaaqutaq arfineq-pingasunut oqaatiginnissimmaasimanngillat. Qulimiguullit aappaat killeqarfiup kujataatungaanukarpoq.

Ajutoornermik tamassuminnga nalaatsisimagaanni politiinut imaluunniit katersuuffimmut Aabenraa-mi Bjerndrupvej 11-miittumut saaffiginninnissaq kajumissaarutaavoq.

Syd- og Sønderjyllands Politi ajutoorfimmi eqqaanilu suli amerlasuunik sulisoqartut ilisimatitsissutaavoq.

Ajutoortoqarneranut suna pissutaanersoq politiit suli paasiniarpaat. Qimuttuitsulli ikaartarfianni assiaquserneqarsimanngitsumi ajutoortoqarsimasoq paasineqarpoq.

Qimuttuitsut ikaalernerinik allatut kalerrisaarisoqarsimanersoq, soorlu sianeqarsimanersoq assigisaanilluunniit peqarsimanersoq politiit misissorpaat.

Danskit angallannermut ministeriat: "Ajutoorneq alianangaartoq"

Danskit angallannermut ministeriata Thomas Danielsenip (V) tamanna „ajunaarnertut alianangaartutut“ taavaa.

- Inerniliussinnginnitsinni Ajutoornerit pillugit ataatsimiititaliap, Banedanmarkip aamma DSB-p qanoq pisoqarsimaneranik paasiniaalluinnarnissaat pingaaruteqarluinnarpoq, Thomas Danielsen allakkatigut oqaaseqaateqarpoq.

- Ilaqutaasut akissutissanik pisariaqartitsinerat paasilluarpara, taamaattumillu ajutoornermut tunngasut tamarmik misissorneqarumaarput, nangilluni allappoq.

Qimuttuitsut ajutoortut InterCityLyn 951-iusimasut nalunaaqutarlu arfinermut tanneq pingasunngulernerani Sønderborgimut tikittussaasimasut, DSB-p nittartagaani allassimavoq.

DSB Falck Healthcare aqqutigalugu qimuttuitsunut ilaasut ilaqutaanut sianerfissamik pilersitsivoq.

70244514-mut sianertoqarsinnaavoq.

Meeqqat 30-t 40-llu akornanni amerlassusillit ajutoorfimmit qimagutsinneqarsimasut, Ekstra Bladetip assiliisua ajutoorfimmiittoq oqaluttuarpoq. Assiliisoq naapertorlugu ilarpassui "ipertupput ilaallu aanaalaarlutik."

- Ajornartoornermi tippinut poortorsimapput, angajoqqaavinullu ungasiartumiittunukaanneqarlutik, Ekstra Bladetip assiliisua oqaluttuarpoq.

Aabenraa Kommunia Sydjyllandimi kommunit allat marluk, Haderslev aamma Tønder, suleqatigalugit „ataatsimut upalungaarsimanermik“ pilersitsisoq, Aabenraa Kommuniani borgmesteri Jan Riber Jakobsen Ritzauimut oqarpoq.

Oqartussaasut piareersimanerat upalungaarsimanermut ilaavoq, taamaalillutik inuit eqqugaasut unnuiffissaqartinneqarnissaannut allatigulluunniit ikiorneqarnissaannut piareersimapput.

Aqqut matuneqartoq

Ajutoorfimmi qimuttuitsut aqqutaat ataasiinnaasoq, ajutoornerullu kingunerisaanik matuneqarsimasoq, Banedanmark ilisimatitsivoq.

Sapaatip-akunnerata naanerani Tinglev-imit Sønderborgimut qimuttuitsuussisoqassanngitsoq DSB-p tallimanngornermi unnukkut nalunaaqutaq qulingiluap qeqqa X-imi nalunaarutigaa. Taarsiullugu bussinik angalasoqassaaq.

Juulimi biilit assartuutit qimuttuitsullu Kliplevimi qimuttuitsut ikaartarfianni aporput, tassanilu angut 24-nik ukiulik ajunaarpoq.

TVSyd naapertorlugu tallimanngornermi qimuttuitsut ajutoornerat sumiiffimmi tassani pinngilaq, tamannali politiit suli uppernarsarsinnaanngilaat.

/ritzau/