Inuit qulinit 15-it missaannut amerlassuseqartut MAGA-mik teqqiaqartut Nuup mittarfiani nalunaaqutaq aqqaninngulersoq tikilluaqqusiartorput.

Tikittarfimmullu matut ammanngitsuulluunniit Jørgen Boassen arpalluni siulliulluni Donald Trump Junior eqerujussuarpaa. Trump Juniorip akillugu eqippaa, qungujullunilu:

- Maaniinnerput nuannarilluinnarparput. Manna tupinnarluinnartoq takusarlugu takornariarpugut. Maanngarnissarput piffissami sivisulaami oqaluuserinikuuarput. Isikkivik alutornarluinnarpoq, oqarpoq, taliminillu ussersorluni.

Jørgen Boassen Donald Trumpip qineqqusaarneranut ikiuukkiartorluni ukiaq USA-miippoq – taassumalu Trump ukiorpassuarni tapersersorsimavaa. Ullumikkullu nuannaartorilluinnarlugu: 

- Pikkunaq takuarput aatsaaginnaq mittoq, sakkortoq misigisaq nuanneq, Jørgen Boassen KNR-imut oqarpoq.

- Soorunami nunatsinnut soqutiginnikkamik soorunami tikilluaqqusaapput alakkarterissallutik nunarput sunaanersoq. Aamma niueqatiginninneq suleqatiginninnerlu aatsaat ammarniarneqalerput. Kisianni una pingaarnertut eqqaamassavarsi tapersersuisutut ilaagama aamma Amerikami taakku tusaamagaminnga ukiorpassuit tapersersueqataanikuusimasunga taamaattumik aamma attavigineqarpunga tikinnissaat sioqqullugu, Jørgen Boassen oqarpoq, taassuma tikeraarnera Donald Trumpip nunatsinnik soqutiginninneranut atassuteqartoq uppernarsarlugu.

- Soorunami nunarput ukiut qassit soqutiginikuuaa aamma mittarfittaarsuarput ima iluaqutaalertigivoq allaat nunanit allaninngaanniit tikittoqarsinnaanngorluta. Nunap pissaaneqarnerpaat aqutsisussai, Jørgen Boassen oqarpoq.

Pisiariniarsariartorluta maanngarpa?

- Pisiarineqarsinnaanngilagut aamma taanna oqaatigereerpaat namminneq. Kisianni suleqatiginnissinnaavugut nunarput pituttorsimasussaanngilaq nunamut ataatsimut, kisianni uanga politikeriunngilanga inuiaat namminneq taanna qinerumaarpaat.

Trump Junior angerlarpat susoqarnissaa naatsorsuutigaajuk?

- Soorunami eqqartussaavaa suna misigisimanerlugu aamma inuit qanoq innersut taanna qularnanngilluinnarpoq aamma ilimagivara massakkut aaqqissuisut ilaasa uternissaminnut ilaaqqugaluarpaannga kisianni uanga massakkut periarfissaqannginnama kingusinnerusukkut ivertinneqarnissaanut ilimanarpoq taakungassasunga.

Maannakkut sumunnalerpa?

- Tassa maani illoqarfiup iluani angalaassapput assigiinnngitsunut takornariagassat takornariarlugit, aallarunik Floridamut uteqqissapput. Soorlumi Hotel Hans Egedemi nereqatigiipajaassamaartugut.

Jørgen Boassenip nuliata, Annette Helene Pindip uini pissangangaatsiarsimasoq oqaatigisinnaavaa.

- Tupaallannarpoq – taamaappallaaranili – ullumikkut tikinniartut ippassaq nalunaarfigineqarpugut, taanna KNR-imut oqarpoq.

- Kisianni sinilluarpallaanngissoraara, Trumpimi præsidentinngunngikkallarmalli tapersersuisuulerpoq, taamaammat ullumikkut tulluusimaartorujussuusoraara, annoraaqarlunilu tamanna takutillugu.

Illimmi? Donald Trump aamma nuannaraajuk, imaluunniit aappaalluarlutit malinnaaginnarpit?

- Aappaalluarnerusutuuneruvoq. Uanga taamatulli politikkilerivallanngilanga, kisianni soorunami malinnaallunga tapersersorpara.

Teqqianik ‘Make America great again’-imik allannertalimmik agguaassisut takusinnaavara, taama ittumik teqqiaqassavit?

- Aap, aana tigummiarpara, taamaammat teqqiap tullia ‘Make Greenland great again’-imik allannertaqarsinnaavoq, Annette Helene Pind oqarpoq.

Trumpip timmisartua Floridamut uterluni nalunaaqutaq 15.30 aallaqqippoq.