Jens-Frederik Nielsenip danskit naalakkersuisuutitaqalernissaannut erinisuttoq

Danmarkimi naalakkersuisoqatigiinnik ivertitsiniarneq sivisuallaarpoq, tamannalu Kalaallit Nunaannut ajornartorsiutaavoq.

Naalakkersuisut siulittaasuata Jens-Frederik Nielsenip (D) oqarnera naapertorlugu, Kalaallit Nunaat tatineqangaarpoq, Danmarkillu naalakkersuisoqarnissaa pingaaruteqarpoq.

- Danskit qanittukkunni naalakkersuisunngortitsinissaat kissaatigaara. Tamanna Kalaallit Nunaannut nuannersuussaaq. Nunanummi allanut politikki illersornissaqarneq assigisaalu oqaluuserigutsigit, oqaluuserisagut Kunngeqarfik Danmarkimut tunngapput, tassa Kalaallit Nunaat Danmarkilu ataatsimut, Jens-Frederik Nielsen Copenhagen Democracy Summitimi apersorneqarluni oqarpoq.

Jens-Frederik Nielsen Københavnimi, nunat tamalaat ataatsimeersuarneranni ilaatigut ministeriuneq Mette Frederiksen (S) aamma USA-mi sillimaniarnermut siunnersortiusimasoq John Bolton peqatigalugit marlunngornermi ataatsimeeqataassaaq.

Danskit naalakkersuisuineersunik sinniisoqanngitsoq

Nuummi inuussutissarsiornermik suliaqartut Future Greenland-imik taaguutilimmik sapaatip akunnera ataaseq qaangiuppat ataatsimeersuassapput,  USA-llu præsidentiata Donald Trumpip Kalaallit Nunaannut immikkut aallartitaa, Jeff Landry, tassani peqataassaaq.

Naalakkersuisut isumaqatigiinniarnerat pissutigalugu Danmarkimi naalakkersuisuugallartunit ataatsimeersuarnermut peqataasoqassanngilaq.

Jens-Frederik Nielsenip Jeff Landry ataatsimeersuarnermut atatillugu ataatsimeeqatigissanerlugu akisinnaanngilaa.

- Suli naluara. Naapinniarpaanga, taava qanoq kissaateqarnersoq erseqqissumik paaserusuppara. Kalaallit Nunaanni tamanna nalunngilluinnarparput. Qaammatini 15-ini 16-inilu taamatut tatineqarnikuuvugut, naalakkersuisut siulittaasuat oqarpoq.

Kingusinnerusukkut apersorneqarnermini oqarpoq "pimoorussassamik oqaluuserinnittoqassagaluarpat“ soorunami "oqaloqatigiumaarlugu“.

Jens-Frederik Nielsenip Kalaallit Nunaata inissisimaffianik ataqqinninneq piumasariniarlugu apersorneqarnermini nangilluni oqaatigaa. Kalaallit Nunaat tuniniarneqanngilaq, tiguneqarnissamik sioorasaarinerit Kalaallit Nunaata akuerinavianngilaa.

- Naalakkersuisut siulittaasuattut arlaannik pinngitsoortitsisinnaannginnerput inunnut oqaatigissallugu takorluulaaruk. Pissutsit qanoq pimoorutsiginerigut najuunnitsinni takutissagipput isumaqarpunga, taanna oqarpoq.

Ataqqinnittoqarpat ataatsimiinnissamut piareeqqasoq

Illuatungaatigulli Jens-Frederik Nielsenip, Kalaallit Nunaat nunatut ataqqineqarpat, Amerikamiut niuernikkut suleqatigiinneq pinngortitamilu pisuussutinik piiaaneq eqqartorniarlugit,  qanimut isumaqatigiinniarfiginissaannut piareeqqavoq. Isumannaallisaanermut aamma tunngatillugu.

- Iliuuseqarnerunissatsinnut piareersimavugut. Nunat tamalaat isumannaatsuunissaat eqqarsaatigalugu Natomi akisussaaffeqarnerulernissamut, niuernikkut suleqatigiinnerup annertusinissaanut pitsaanerusumillu suleqateqarnissamut piareersimavugut, Jens-Frederik Nielsen oqarpoq.

USA-p, Kalaallit Nunaata Danmarkillu akornanni, Donald Trumpip Kalaallit Nunaat tiguarnissaanik ukiuni kingullerni arlaleriarluni oqareernerata kingorna, isumaqatigiinniarnerit suli ingerlanneqartut pillugit sukumiinerusumik oqaaseqarusunngilaq.

- Isumaqatiginninniarpugut, isumaqatigiissuteqanngilagulli, Jens-Frederik Nielsen oqarpoq.