Ivalop nunasiaataasimaneq Københavnimi ikerasalianit oqaluttuarigaa
- Kalaallit Nunaata oqaluttuarisaanera maani ikerasaliani takussaaqaaq. Kalaallillu Nunaata oqaluttuarisaanera Danmarkimiit ilisimaneqalernissaa pingaaruteqarpoq, Ivalo Olsvig ikerasaliat tungaannut sammilluni oqarpoq.
Erfalasorput Københavnimi Nordatlantens Bryggemi ullumi aggustip ulluisa ilaanni erfalavoq.
Grønlandsk Handels Plads inunnik ulikkaarpoq nerisassanillu nunanit allaninngaanniit tuniniaasoqarluni. Sumiiffiup ateqaataata paasinarsisippaa Kalaallit Nunaannit, soorlu ammit orsorlu tamaani nioorarneqariarlutik Europamut taamani tuniniarneqartartut.
Tulattarfik Langeliniekaj saneqqukkaanni pingajoqqat Kalaallit Nunaannut ilisarnaatitut bronzemik qiperukkat takuneqarsinnaapput.
Kalaallit Nunaata nunasiaataanerullu oqaluttuassartaat Københavnimi angalaarluni saqqummertarput.
Oqaluttuarisaanermi Grønlandsruten – Historien om Kalaallit Nunaat og Danmark fortalt fra kanalenimi oqaluttuarineqartumi Københavnimiut takornariallu nutaamik takusassaqartinneqarput.
Ivalo Olsvig namminersortuusoq nunarput issittorlu pillugit ukkataqartoq ikerasaliani angalaarnermi nutaami ilaasunut saneqqunneqartut pillugit mikrofonikkut nassuiaassisarpoq.
- Assigiinngitsut amerlanerit inunnit ullut tamaasa sanioqqutiinnarneqartartuusoraakka. Taamaammat taakku oqaluttuarinissaat pingaaruteqarpoq. Taakku illorsuarnut Nationalmuseumitut ittunut tunngasinnaapput imaluunniit nannunik assilialiannguamut tunngassuteqarsinnaapput. Oqaluttuassartalernissaannut tunngassuteqarpoq, taanna oqarpoq.
Kalaallit isiginninnerat
Ikerasaliani angalaarneq Naalagaaffiit Peqatigiit nunat inoqqaavinut ullorititaanni tassa aggustip qulingiluaanni pilersinneqarpoq, taannalu Strommap ikerasaliatigut angallassinermik neqerooruteqartartup, Mellemfolkeligt Samvirkep aamma Danmarkimi kalaallit peqatigiiffiata - Uagut akornanni suleqatigiinnikkut pilersinneqarpoq.
Erinarsortartoq isiginnaartitsisartorlu Karina Møller nunasiaateqarnerup nalaanit danskillu illoqarfiisa pingaarnersaannut ullumikkut kingunerisaanik oqaluttuanik ilaasunit nalaarneqarsinnaasunik tusarnaagassiamik immiussisuuvoq.
Ivalo Olsvigip nunasiaataanerup oqaluttuarisaanerani isiginninnerpassuit oqaatigineqarsimanngitsut erseqqissarniarpai.
- Danskit Kalaallit oqaluttuarisaaneranni isiginninnerat assigiinngitsorpassuupput, kisianni Kalaallit Nunatta Danmarkillu akornanni oqaluttuarisaanermut isiginninnerat aamma taama amerlatigipput, taanna oqarpoq, nangillunilu:
- Uanga suliamut atatillugu isumaqarpunga kalaallit isiginninnerannik tusarusuttut amerlanerusut, tamannalu maani tusaaneqarsinnaavoq. Kalaallimmi isiginninnerat oqaluttuarisaanermilu inuit pingaaruteqartut ilanngunnissaat ukkataralugu sammingaatsiarpara.
Kunngimut ilassinnikkiartorneq
Angallat Amalienborg saneqqutilermagu tusarnaartut atuakkanik naqiterisartup aaqqissuisullu Lars Møllerip aamma Aqqaluk Møllerimik taaneqartartup kunngimut ilassinnikkiartornera pillugu 18 hunnorujukkunneersumik oqalungusiarineqarpoq.
Tassanimi pisoq oqaluttuarisaanermut ilanngunneqartoq pivoq.
- Kunngip kalaallimik aatsaat naapitaqarluni Aqqalummut oqaatigaa. Aqqaluullu kunngimik aatsaat naapitaqarluni akivaa, Ivalo Olsvig oqarpoq, illarlunilu.
Oqalungusiaat nunasiaataanerup oqaluttuarisaanera aamma Kalaallit Nunaata Danmarkillu kulturikkut naapinnerannik imaqarpoq, Ivalo Olsvig nassuiaavoq. Ilisimasaq tamanna ikerasaliami tusarnaajutaa angalaartunut ingerlateqqikkusuppaa.
Nunasiaataanermi oqaluttuarisaaneq pillugu Danmarkimi ullumikkut ilisimasat naammannginnerannik taanna isumaqarpoq.
- Tamanna misissuinerit takutittuarpaat.
Taamaakkaluartoq, kalaallinit oqaluttuarineqarnissaat soqutiginartinneqaraluttuinnarnerarpai.
- Apeqqutigineqarnerulerput. Suleqatinnillu aamma tamanna malugaara. Soqutigineqarneranni saqqummiunniartigit.
- Taamaattuminguna ikerasaliani angalaartunut oqaluttuarusuttunga. Taamaaliornikkut amerlasuut oqaluttuussinnaavakka, soorlu kalaallit maani Danmarkimi takornariarusullutik Københavnillu umiarsualivianik takorusuisut takornariartulluunniit Danmarkip nunasiaateqarsimaneranik paasinnikkusuttut imaluunniit Kalaallit Nunaata Danmarkillu ataqatigiinnerat pillugu aammalu Kalaallit Nunaata namminersortuuneranut tunngatillugu paasisaqarusuttut oqaluttuarfigisinnaagakkit, taanna oqarpoq.
