Peqqinnissaqarfimmi aqutsisut: Isumaqatigiinniarnermi tusaaniarneqanngitsutut misigisimapput

Peqqinnissaqarfimmi sulisunut isumaqatigiissut akuerineqaraluartoq, tamanilli tigulluarneqanngilaq.

Peqqinnissaqarfimmi suliaqarfinni aqutsisut 40-t missaanniittut, ataatsimoorussamik akissuteqarlutik allagaqarput, isumaqatigiinniarnermimi puigorneqarsimasutut misigisimapput.

-Atorfeqarlutik sulisut akissarsiaqarnerulersinneqarput, ajunngitsorsiassallu aamma annertusineqarput, aqutsisut kiserngorupput taama assingusumik pineqarnissaminnut - tassa aningaasaqarnikkut suliffimmilu atukkat eqqarsaatigalugit. Tamanna assut nikallornarpoq!

Aqutsisut naapertorlugit tapiissutisianik pissarsiaqarsimanngillat, aqutsisutullu amerlasuuni suliani aamma tapeqartarsimanngillat, ilaatigut sulisussaaleqinermi matussusiisoqarniartillugu.

Peqqinnissaqarfimmi aqutsisutut atorfeqarneq soqutigineqanngitsoq, aqutsisut allakkaminni taama isummerput.

-Assigiinngisitsineruvoq, aqutsisutut atorfik ajornakusoorsarneqarpoq, aqutsisunillu sulianut tulluartunik atorfinittitsinissaq ajornarnerulersinneqarpoq, saaffiginnissummi taama aqutsisut allapput.

Aqutsisunut ilungersunarninngorpoq

Suliat amerlasuut aqutsisuniit taakkartorneqarput: Ulluinnarni ingerlatsineq, sulisussanik pilersaarusiorneq, suliffimmi avatagiisit atorfinittitsisarnerlu ilaapput - tamanna ilutigalugu sulisussaaleqinermi, namminneq paarlattaasutut sulisarsimapput. 

Amerlasuut piffissaq suliffiusussaq sinnerlugu sulisarput, piffissallu ilaqqinnissaanut periarfissaqartaratik. Tamanna suliffimmik pitsaanngitsumik pilersitsisartoq, aqutsisut saaffiginnissummi allappaat. Tamanna pissutigalugu aqutsisutut sulisut uippakajaarnermik napparsimanernillu eqqorneqartarput.

- Peqqinnissaqarfimmi sulisut suliffinnut naliginnaasunut uteqqinnissaat ernumassutigaaput, tassami akissarsiat sulinermilu atukkat pitsaanerulersinneqarsimapput. Suliaqarsinnaassusaannarmik annaasaqarnerunngilaq - aalaakkaattunik, ataavartumik ineriartortuartumillu peqqissinnissaqarfimmik pilersitsinissamut ajoqusiisinnaavoq, taama allapput.

Aqutsisut immikkut isumaqatigiissumik piumasaqarput

Aqutsisunut immikkut isumaqatigiissuteqarnissamik maqaasisaqarnertik, tassa suliarisat akisussaaffiillu akuerineqarnissaat, saaffiiginnissumi ilaatigut tamanna naqissuserpaat - soorlu naalakkersuisoqarfimmi immikkoortortani allanittaaq taamak iliortoqartartoq. 

-Ataqqineqarneq, akuerineqarneq atugassarititaasullu, aqutsinissamut pitsaaqutissat ataavartitsisallu kiissaatigaagut, taama allapput.

Aqutsisut 2023-mi peqqinnissaqarfimmi siunnersuuteqartartunit nalunaarusiamut innersuussipput, tassani  aqutsisoqarneq ataavartumik peqqinnissaqarfimmi ineriartortitsinermut pingaaruteqartuusoq oqaatigineqarmat.

Tamanna ataavartumik ingerlanissaq, nutaamik isumaqatigiissusiornerup kingorna, ernumanartumut inississinnaanera aarlerinartippaat.