Naalakkersuisut, Savalimmiunilu naalakkersuisut danskillu naalakkersuisuisa Issittumi Atlantikullu avannaani illersornissamut isumaqatigiissutip immikkoortua siulleq isumaqatigiissutigimmassulli qaammatit aqqanilingajaat qaangiussimalerput. 

Umiarsuit Thetisimik ilisarnaatillit ukiunik foorungajannik pisoqaassusillit, imartatsinni maanna angalasut, taarsiutissaannik issittumut naleqqussakkanik nutaanik umiarsisoqarnissaa isumaqatigiissummi ilaatigut allaqqavoq.

DR-illi nutaarsiassiinera naapertorlugu, isumaqatigiissusiortoqarneranit ukioq ataaseq qaangiutilillartorli pisiffissamik suli isumaqatigiissusiortoqanngilaq.

- Tamanna akuerineqarsinnaanngilaq, Aaja Chemnitz (IA), tamanna pillugu DR-imut oqarpoq. 

Tamaani annaassiniarnermut siunnersuisoqatigiit ukiumoortumik nalunaarusiaat eqqarsaatigalugu tamanna ernumanartoqartippaa. Nalunaarusiammi takutippaa 2024-mi annaassiniarnermi anguniagaq naammassineqarsimanngitsoq.

Illersornissamut ministeriaqarfiup nassuiaanera naapertorlugu, Issittumi Sakkutooqarfiup atortuisa ajornartorsiutaanerat taamaattoqarneranut pissutaanerpaavoq.

Umiarsuit alapernaarsuutit teknikkikkut ajornartorsiuteqarneq pissutigalugu umiarsualivimmi sivisuumik uninngasarsimanerat DR-ip KNR-illu arlaleriarlutik allaaserisaqattaarnikuuaat. 

Umiarsuup alapernaarsuutip 'Vædderen'-ip maskiinalunnera pissutigalugu qanittukkut Danmarkimukaanneqartoq, DR allappoq.

Piffissaq killeqartoq

Kalaallit Nunaat, Savalimmiut Danmarkilu nunatta illersornissaanut atatillugu januaarimi isumaqatigiissutip immikkoortuata siulliup naammassineqarneranit maannamut  isumaqatigiissummik immikkoortumik allamik atsioqatigiipput. Illersornissaqarfik katillugit tallimanik umiarsuaateqalerniassammat umiarsuit marlunnik ilaneqarnissaannut aningaasaliisoqarnissaa tassani aalajangiunneqarpoq, taamaaliornikkut umiarsuit Knud Rasmussenimik ilisarnaatillit aamma taarsersorneqassapput.

 Umiarsuup siulliup 2030-mi angalanissamut piareersimanissaa pilersaarutaagaluarpoq. 

DR-ip paasissutissanik aallerfii atiisigut taaneqanngitsut oqarneri naapertorlugit, umiarsuup 2030-mut piareerlugu sananeqassappat piffissaq killeqarpoq.

Sakkutuut imarsiortut pisortarisimasaat Henrik Rybergip peqqissaartuuneq pingaaruteqaraluartoq aalajangiinissaq pisariaqartartoq tusagassiuutinut oqaatigaa.

- [...] aalajangiisoqanngippat paatsiveerunnissap tungaanut misissoqqissaartoqarsinnaavoq. Paasissutissallu pissarsiarerusutagut tamakkiisumik misissunngitsuussavagut, taanna oqarpoq.

Umiarsuassat nutaat ilusissaannik isikkussaannillu titartaaneq 2026-mi naammassineqartussatut naatsorsuutigineqartoq, Illersornissamut ministereqarfik DR-imut allakkatigut akissummini ilisimatitsivoq. 

- Sakkutuut umiarsuaannik sorsuutinik, soorlu issittumi sakkutuunut umiarsuassanik, sanaartorneq suliassarujussuuvoq ajornakusoortoq Danmarkimi ukiorpassuanngortuni suliarineqarsimanngitsoq. Taamaattumik sanaartornerup aallartinnissaanut aalajangiisoqannginnerani tunngavissaqarluarnissaq, Illersornissamut ministereqarfik allappoq.

Illersornissamut ministeri Troels Lund Poulsen apersorneqarumanngitsoq, DR-i allappoq.