Inatsisartunut ilaasortanut suliassaq imaannaanngitsoq
Paasissutissat nutaat taama amerlatigut qanoq ililluni ulloq ataasiinnaq atorlugu atuarneqarsinnaagamik? Ajornarluinnartutut isikkoqarpoq, kisianni tassa Inatsisartunut ilaasortat tamanna suliassarivaat. Aatsitassat pillugit ataatsimiititaliami ilaasortanut aammalu Nunanut Allanut Sillimaniarnermullu ataatsimiititaliamut ilaasortanut ajornannginnerulaarpoq. Taakkumi atuagassat tallimanngormat unnukkut tigusimavaat.
-Nalunaarusiap taama pingaaruteqartigisup atuarnissaanut minnerunngitsumillu oqallisiginissaanut ullormik ataasiinnarmik periarfissinneqarnerput naleqqutinngilaq. Inatsisartuni ilaasortaqatikka nalunaarusiaq pillugu oqaloqatiginissaanut periarfissaqarusukkaluarpunga. Inatsisartuni ukiorpassuarni oqallisigisassatta pingaarnerpaat ilagivaat, Agathe Fontain kamalluni knr.gl-imut oqarpoq.
Nalunaarusiap Danmarkimi tunniunneqaqqaarsimanera Nunatsinnilu kingusinnerusukkut tunniunneqarnera apeqquserneqarsinnaavoq. Uranimi pillugu aalajangerit Nunatsinni pisussaapput. Taamaammat aamma politikerit uranimut akuersaanngilluinnarnerup atorunnaarsinneqarnissaanik aqagu siullermeerinnittussat taama pingaartueqartigisunut piffissaqarnerunnginnerat pissusissamisoortutut iskkoqanngilaq.
-Nalunaarusiaq pillugu tusagassiortunik katersortitsisoqareerpat tigusinnaassallugu neriuutigaarput. Taavami pisortatiguulissaaq, taamali pingaaruteqartigisumut ullormik ataasiinnarmik periarfissinneqarnerput pissusissamisuunngilaq. Taamaammat Inatsisartuut siunnersuutiginiarparput siullermeerneqarnera kinguartinneqassasoq, ilaasortat tamarmik paasissutissaniki suliamut tunngasunik paasinnilluarnissaat qulakkeerniarlugu, Agathe Fontain oqarpoq.