Aalisarnermut inatsit: Illuatungiliuttut ajunaalernermik kalerrisaaruteqarput

Aalisarnermut inatsit maannakkutut itsillugu akuerineqassappat kingunerluutaasussanik ilungersunarluinnartunik isiginngitsuusaarisoqarnissaa illuatungiliuttut ernumassutigaat.
Illuatungiliuttut aalisarnermut inatsisissaq maannakkutut itsillugu akuerineqassappat sinerissap qanittuani aalisartut pillugit ernumassuteqarput. Assi © : Malik Brøns/ KNR
maajip 06-at 2024 11:37
Nutserisoq Connie Fontain

- Pingasunngorpat allanngortinnagu inissittoqassappat: Mayday mayday mayday, this is Kalaallit Nunaat ajunaalerpugut. Taamatut inissittoqassaaq, Naleqqamit Jens Napatooq oqarpoq.

Taanna aalisarneq pillugu ataatsimiititaliami, pilersaarut malillugu aalisarnermut inatsisissamut siunnersuut Inatsisartunut sapaatiummat tunniussisussaagaluartumi, ilaasortaavoq.

Ataatsimiititaliarli eqqarsarfissaqarnissamik qinnuteqarpoq, siunnersuummi sapaammi ullup-qeqqanut tunniunneqarfissaanut angumersisinnaasimanngillat.

Taamaammat siunnersuut aappassaaneerneqarfissaanit, Inatsisartunut qinikkat pingasunngornermi oqaluuserisassaanit maanna peerneqarpoq.

Aappassaaneerneqarfissaa tallimanngornermut, immikkut ataatsimiiffissamut qnikkat aggersarneqarfigisaannut kinguartinneqarpoq, tamanna Inatsisartut nittartagaanni allassimavoq.

Kingunerluutissat isiginngitsuusaarneqarsinnaanngitsut

Tamannali arlallit inatsisissap oqaluuserineqarnerani tusaanngitsuusaarneqartutut misigisimanerannut allannguinngilaq.

- Tusaaneqartutut misigisimanngeqaanga, aalisartut tusaaneqartariaqaraluartut tusaaneqanngitsutut misigisimaffigeqaakka, sulisartut eqqugaasussat imaannanngitsorujussuarmik ornitaqarput. Isumaqarpunga ammanerusumik peqataatinneqarnissaat pisariaqaraluartoq, Jens Napaattooq oqarpoq.

Aalisarneq pillugu inatsit

Aalisarneq pillugu inatsisissaq ukiuni 20-ni utaqqineqarsimavoq.

Inatsit maanna atuuttoq 1996-imeersuuvoq. Taamanili inatsimmut ilassutinik allannguutinillu arlalissuarnik inatsisartut aalajangiisarput. 

Aalisarneq pillugu ataatsimiititaliarsuaq aalisarneq pillugu inatsip qanoq imaqarnissaanut inassuteqaatinik arlalinnik 2021-mi saqqummiivoq.

Aalisarnermut naalakkersuisoqarfimmi atorfillit inatsisissamik saqqummeeqqammerput. Tusarniaassutigineqarnera pingasunngornermut januaarip 24-anut killeqarpoq.

Nunaqarfinni illoqarfinnilu politikerit aalisartullu, inatsisissap oqaasertaasa tusarniaassutigineqarnerata sapaatit akunnerinik arfineq-pingasuinnarnik sivisussusilerneqarsimanera puffaqqassutigaat.

Kim Kielsenip aalisarnermut inatsisissatut siunnersuut Inatsisartunut marsimi tunniuppaa.

Inatsisartut upernaakkut ataatsimiinnerminni aalisarnermut inatsit oqaluuserissavaat.

Partii siulittaasup oqaaseqarneratigut taama isumaqartunut allanut ilannguppoq, Nalerarlu taama misigisimasuni kisiartaanngilaq.

Demokraatit siulittaasuata taamatorluinnaq isumaqarluni tallimanngormat oqaaseqarpoq.

- Politikkimi oqallinnermi manna tikilllugu tusaaniarneqanngilagut, Jens-Frederik Nielsen oqarpoq.

Tamannalu kingunerluuteqarsinnaasoq, Naleqqamit, Jens Napaattooq isumaqarpoq:

- Aalisartukillisaaneq sinerissap qanittuani, avataasiortunik namminersortut pisassaannik innarliivallaarujussuarnerit aamma aalisartunik nunami fabrikkinut ikilisaanermut allarpassuarnullu sunniutigisinnaasaat amiilaarnartorujussuit amerlasuut aggerput.

Immikkut ilisimasallit aamma ilisimatusartut arlallit aamma taama aarlerisaaruteqarnikuupput.

Isorliusuniittut pillugit ernumasoq

Jens Napaattooq parteeqatimi Inatsisartunilu suleqatimi, Hans Enoksenip Inatsisartunut §37-mik apeqqummi aalisarnermut inatsisip kingusinissaanut atatillugu arlalinnik sapaatip akunnerani siusinnerusumi apeqquteqarnerata nalaani oqaaseqarpoq.

Naleqqamit aalisartut qanoq atugaqarnissaat, qanoq pilersaaruteqartoqarnersoq, naalakkersuisut aalisartunut aalisarnermut inatsisip kingunerisaanik aalisarunnaartussanut imaluunniit aalisarunnaartariaqartunut suliffissanik, inissanik ilinniarfissanillu qulakkeerisimanersut ilaatigut apeqqutigineqarput.

Maannakkummi missingersuutaasoq isorliunerusuni sinerissap qanittuani aalisartuaqqanut kingunerluuteqangaatsiarnissaa partiip ernumassutigaa.

- Ernumasorujussuuvunga, peqqutigalugu uanga upernavimmiuuvunga aalisartut ullut tamaasa isigaakka, kaperlakkaluarpat taaraluarpat periarfissaqartillutik sikunik aporfeqanngikkunik aalisarniarsariinnartut. Siku saattunnguaq allaat ammartertoq sarfanik aalisarfigivaat aningaasarsiorfigivaat inuusariaqaramik. Nunamut qaqeqquneqarput, nunamut qaqigunik sumut ilinniariassaagmik? 80 procentiimi 50-it sinnerlugit ukioqarput, Jens Napaatoq oqarpoq.